Oté

L’ultra-Droite la réinir Sin-Pyèr : Rozoir vide, sa i fé bonpé dézord !

Justin / 15 désanm 2009

Sak la suiv in pé laktyalité dimansh dèrnyé la antann parl la Droite... Forséman, toute son bann batèr tanbour la pa manké d’ète la, épi tash moiyin an parlé pou donn, si lé possib, in bon figuir so mouvman k’i koné pa, konm di kréol, son dovan avèk son deryèr… an parlan par réspé. Vi ké li lé dann l’UMP, mé li lé pa dakor son prop parti.
Alor, konm lé oblizé, kan ou lé kandida, propoz in program... banna la fé inn.
Mé dizon toutsuit, sa i kass pa lé kat pat d’in kanar. Pou kossa ? Pars banna na poin z’idé konm k’i fo pou nout péi... si zot l’avé z’idé, zot noré pa mank fé savoir sa kan la fé Zéta-zénéro. Pèrsone la pa antann azot. Zot té konm martin ki-kouzi ! Arzoute èk sa lo shèf banna, sé plis in kassèr k’in batissèr, vi k’li la donn kou d’pyé dann larzan fète, dann san dis milyon té prévi pou fé la rokade Tampon. Armète la-dsi ké boug-la i prétan pa i fé lozman sosyal, konm la loi i obliz, dann son komine.
Donk, kont pa dsi li pou an avoir in z’idé valab... Mé Virapoullé, li, li nana... sof si zordi li di blan, domin li di noir, apré domin li di gri… pars sak i konte pou li sé bate son lang. Pou li, konm pou l’ultra-Droite réini la-ba Sin-Pyèr, késtyonn z’idé, késtyonn program, sé zéro kalbass, sé rozoir vide... konm di lo kont, sa i fé bonpé dézord !

 Justin 


Kanalreunion.com