Oté

L’UNESCO, banna i koné anou !

Justin / 5 out 2010

Dépi dé zour, bann kriyèr d’nuite i donn la voi dann radio, sansa la plime i grinn dé fé. Sak l’a jamé sousyé nout patrimoine, zot mèm lé ziska pli for pou déklar wati-watia, sé zot la fé si, sé zot la fé la, gasparin-briné, briné-gasparin. Konm di lo kont, la viktoir na famiy nonbrèz.
Solman nana inn-dé vérité i fo ni rapèl. Ni koné par égzanp listoryin Sudel Fuma i travay avèk l’UNESCO dépui kèk-é-kèk zané ; “La route lésklavaz”, sa lété fé avèk l’UNESCO mèm. Lo promyé oktob, sé la MCUR la gingn fé inskri nout maloya dann Patrimoine mondyal. Arzoute èk sa lo park naturel lé-o, nana in bonpé d’moun la Droite lété kont, é piton-sirk-ranpar, sa z’anfan lo park lé-o. Ni souvyin mèm, é sa lé sir-é-sèrtin, é toulmoun i koné, Didier Robert la di li lé kont lo park dann l’ané 2006 é li la pa di dépi tan-la ké li lé pour...
Zordi, la prézidante l’IRT, in l’adzointe lo mèr Tampon, i di sa va fé avans nout tourism. Bin akoz la pa mazine sa dann tan-la ? Pars in pé i oi pa pli loin ké z’ot bout né ? Tan k’anou, ni koné byin la-ba l’UNESCO, i koné bann progrésist La Rényon. Ni koné zot i koné anou é pa aryink zordi*.

* La pa sir l’UNESCO va kontinyé byin oir anou kan va konète inn-dé l’arète fé la MCUR.
UNESCO : Organisation des Nations Unies pour la science, l’éducation et la culture.

Justin


Kanalreunion.com