Oté

La ba déor, i ptrétan la gosh i sifok !

Justin / 26 désanm 2015

Dopi k’lo prézidan holland lé an plas, dopi 2012 boudikont néna la touzour domandé, éské gouvérnman la lé a gosh pou do bon, pou travayèr ou sinonsa li ral déryèr èk lo gro ? Néna sak lé kont, i trouv pa, minm pa inn ti gign dan sak lé fé é osi dot dawar i trouv zot kont, vik zot i bat la min. An gro ni pé di moun la gosh té plizoumwin kontan, kan moun la drwat té i ral. Mi di moun la gosh té plizoumwin kontan, i dépan d’si désertin nafèr mandoné minm moun la gosh té in pé an shalèr osi.

La dopi trwa-kat zour, gouvérnman la désid pérmèt la déshéans nasyonalité pou sak lé éné an frans ék néna dé nasyonalité. Manman, bèzman dann la kour patèl. Dikou la drwat èk lèkstrèm drwat i bat la min, vik zot minm dopi lontan zot i domann la déshéans. Moun la gosh i konpran pi, zot i rosan tousala konm in kou pwagnar dann do, konm in trayizon boudikont. Lo minis la zistiss té finn di kont pa si li pou aplik in mézir konm sa, ala li lé oblizé anval son shapo.

Mwin minm, mwin lé pa in éspésyalis la déshéans, mé mi konpran pa tro koman i sar fé. Sipozon in moun néna doub nasyonalité, alé franko-alzéryin, li fé in latanta an frans, i éspédié a li an Alzéri, mé si li fé in latanta an alzéri Ousa i éspédié a li ? I éspédié a li an frans. Ni wa byin, pa konm sa ni sar règ lo problinm. Si la drwat èk lékstrèm drwat i bat la min, mi konpran poukoué la gosh lé éstomaké, la gosh i sifok i prétan !


Kanalreunion.com