Oté

La biodivèrsité, kisa i koné bien sak i pé doné in zour !

Justin / 6 mé 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, asiz aou bien pou pa tonbé pars moin na in n’afèr pou dir aou, é moin lé sir ou i sava tonm kat fèr anlèr kan m’a dir aou sa. M’a dir aou in n’afèr bokou d’moun i pans. Ala koman mi di sa : « Bondyé la fé lo mond pou l’om ! La pa pou son biodivèrsité, pars lo biodivèrsité pou moin sa lé o sèrvis de l’om ! ».

In légzanp : rokin nana son plas si li pran pa la plas dé l’om donk ké li atak pa l’om. Si li atak l’om, i fo tyé ali in poin sé tou. Sé konmsa ké la shas bann rokin lé léjitime si li mète l’onm an danzé… Nana d’ot z’égzanp ankor : tout sak i ansèrv pa l’om i fo z’ot i déblèy kanal. Sé mon filozofi é moin lé sir la majorité d’moun lé dakor avèk moin. Lé konmsa é pa otroman. Sak i pans pa konmsa li marsh pa dsi lo pyé, mé li marsh dsi la tèt. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, sak ou i di zordi na poin arien pou étone amoin, é konm d’abitid moin lé san-pour-san pa dakor avèk ou.

Pou kosa ? Pars, pou moin l’imanité sé in tout é mi pans pa in kréatir lé an droi détruir lé z’ot. Pou kosa mi di sa ? Pars antansion : si ou i détrui lé z’ot, lé posib, domin kisa va ranplas lé z’ot, dann z’ot bon rol. Arzout ankor, ni mète lontan pou konète nout l’antouraj kisoi la fone, kisoi la flor é oplis ni konète azot, oplis ni apèrsoi zot na in rol konplèks-konm i di ; konplèks mé itil pou l’ansanm !

Oplis ni détrui, oplis ni déranj l’ékilib., é déranj in l’ékilib la pa in bon n’afèr. Armète la dsi, ké nana dann nout biodivèrsité do koi, kan nou va bien konète ali, rann méyèr lo mond ni viv anndan… Méfyé l’ignorans ! Méfyé la kouyonis ! Méfyé lo koko dir ! Baz dsi l’intélizans ! Baz dsi la tolérans ! Baz dsi in bon konpréansion lé shoz ! Kisa i koné sak la biodivèrsité i pé doné in zour ? Tok ! Pran sa pou ou !


Kanalreunion.com