Oté

La bou lo gran prado, pou ède nout l’agrikiltir rédi lo rin !

Témoignages.re / 2 zwin 2014

Souvan dé foi, isi La Rényon konm tout l’androi, ou i pass koté in l’éstasyon l’épirasyonn lo. Na dé foi sa lé kashyété dann fin fon la savann, mé na dé foi ou i oi ali bien dopi la rout. Par ébzanp, la-ba Sint-Mari kan ou i roul dsi la rout pou sort Sin-Dni pou alé Sint-André ou i pass koté lo gran prado. Sa sé in l’éstasyon l’épirasyonn lo. Ou i konpran pa bien dopi la rout, mé si ou i sava oir pli pré, dann la zone La Mar, ou i rann aou kont, par ou mèm, ou lé koté lo l’éstasyon. Donk shak foi mi pass la, mi kalkil : si i fé lo nétoiyaz delo, sé ké li lé sal mèm bokou sal, vi k’li la pass par l’égou donkalor i fo na in sèryé zi d’bou : kisoi an lo sal, kisoi an krèm la bou, kisoi an graton la bou. L’èr-la, mi di dann mon kèr : "Justin mounoir, kosa i fé avèk so bou ? i zète , i rofé la bone tèr ansanm, i bril...Kosa i fé"

Moin na in kamarad i apèl La Grès, pars li lé mèg ébin li di amoin akoz i vèrs pa sa dann mon bitasyon ? Moin nora pi la pènn ashté l’angré. Inn dé zour va santi mové, mé apré la natir va okip dé li konm k’i fo, avan sa i pas dsi fridom, é mon kann va bien grandi, mon vèrzé va bien doné, é mon zardin sar o poil, vèy pa. Mi pans, mon dalon-la, si lé mèg la pa pou arien, tout son lénèrzi i sava dann son tèt pou kalkilé. Ni arèt èk sa, mé pa pou mète in poin final, pars figuir azot... La pa toultan, mé na dé foi i ariv. Kosa i ariv ? i ariv ké ou i aprann in bon nouvèl dann télé, sansa dann radyo, ou sinonsa dann zournal. Kosa moin la aprann samdi soir ? Moin l’aprann la-ba dann l’éstasyon l’épirasyon, lo « gran prado » l’apré amenn in program éspérimantal pou konète bien konm ki fo pou tiliz la boue-plito lo bann bou- dann l’agrikiltir.

Mi krétik pa mon kamarad La Grès, mé mi konpran bien dann so bou-la, nana tout sort éspès dé shoz : bon z’afèr pou l’agrikiltir, mé mové z’afèr pou l’anvironeman... konm par ébzanp bann nitrat, bann métal lour, é tout lo tranbloman. Donk mi konpran i pé pa zète sa konmsa dann karo la tèr, i fo laboratoir pou analizé, i fo transform ali pou ké li san pa lo dyab an pijama, épi i fo oir si li lé bon pou toulbon. Sé pou sa la désid fé in léspérimantasion dsi in n’an. Mé déza, i dézéspèr pa in bon l’itilizasyon dann nout l’agrikiltir. Alé ! Pèrd pa kouraj shèrché, rodé, trouvé é aprésa nout l’agrikiltir va nyabou souk avèk sète lé z’ot. Va nyabou rédi lo rin !

Justin

NB. Déza i prévoi va konomiz sink san éro l’angré par dis mil mète karé-kat san vinn sink gotlète si zot i vé. Sé dir azot !... Mi éspèr san tardé moin va antann lo prop, plito ké zète ali dan la mèr, v’aroz zardin ansanm mèm si in pé i di zardin la pa bézoin aroz si tèlman- in rézo d’lo, pétète pa pou boir- mé pou l’itilité d’moun.L’èr-la nou va di sé d’lo dirab pou vréman.


Kanalreunion.com