Oté

La COI i désid in n’afèr la pa bon pou nou ! la pa bon ditou !

Justin / 24 févrié 2016

Mi sort lir la Coi (commission de l’océan indien) i vé lans in nouvo plan pou fèr an sort ké Madagascar i dovien lo farfar manzé pou tout péi i fé pari la COI donk pou nou galman. Zot la bien konpri sak mi di azot, In farfar pou nout manzé. Sa sé in n’afèr i bote pa moin ! Pou kosa solon zot ?

Nana in bonpé rézon.

An partikilyé, mi pans la sékirité alimantèr bannzil l’oséan indien lé riskab ète plis dann danzé ankor ké zordi. Lé vré, zordi, nout l’otosifizans alimantèr lé ménasé : kansréti pars talèr afors zoué avèk dofé dann l’oséan indien i pète in gran bagar é mèm si ni bour pa nout né la-danlé posib ké ni gingn pi ranpli nout z’asyète de ri. Konm dann tan la guèr ! (mé antansion kant mèm pars La Frans lé dann in kan avèk l’Amérik é lé zot, é plito k’alé rode ali la-ba dann l’erop, lé kapab vni rod ali shé nou ! L’èr-la sar pi dann télé ké sa i éspas)

Donk té i fo trouv in solisyon é la solisyon parti kominis i propoz sé l’oto-sifizans alimantèr : moin la fine di sa lé posib, épi sa lé souètab pou nou. Konm di lo kont, isi na bonpé l’arzan, na pliské dann bonpé péi-mal partazé biensir, mé nana an papyé - mé kisa, rantre nou i gingn manz papyé ? Kabri oui, mé domoun non. La sékirité, pou moin sé, produi la baz nout manzé é mèm an avoir in pé pou ramasé é pétète ésporté.

La sékirité i vé pa dir donn Madégaskar lo rol far-far pou tout bann zil l’oséan indien. In gran farfar pou li sré déza in bon n’afèr mé pa pou nou. Fé in n’afèr konmsa sé pa oir pli loin ké lo bout nout né. Si ou i krash anlèr sa i artonm dsi out tète, si out figuir, alala ké ou lé bèrné ! Zordi ni domann siouplé pou nout manzé. Domin ni sar ardomann siouplé pou manzé ! Sa la pa bon pou nou, sa la pa bon ditou !


Kanalreunion.com