Oté

La démokrasi i komann pa ou kashyète la tète dann trou galé !

Justin / 7 zwin 2012

Vantyèr o-soir, moin la agard dann télé lo sobatkoz désèrtin kandida promyé sirkonskripsyon. Konm d’abitid, l’avé bon z’afèr, konm l’avé mové z’afèr. Mé sak moin la trouv drol, sé ké, toudinkou, tout la bann lété pou bann gran shantyé. Konm di Mamo : arète fé l’ipokrite. Moin lé fatigé oir sa ! Akoz mi di sa ? Pars désèrtin an parmi l’avé dé shoz pou arprosh azot... Kisa la anpèsh fé lo Zénith si la pa lo mèr sosyalis épi son l’adzoin lé kandida. Kisa la mète a mor lo Pol oséan ? lo mèm. Kisa la défann fé lo por plézans ? lo mèm ankor. L’èr-la, la pa bézoin ésplinn pou bann z’ouvriyé dann shomaj. Sirtou pa sak lé résponsab.

L’avé lo dépité sortan ; li mèm l’avé fé in bonpé projé pou Sin-Dni, solman li la pa batay pou gard bann projé-la, konm di lo kont, li la bès son bra. Pou kosa ? Pars d’apré sak li di, la démokrasi la transhé. Kèl démokrasi la transhé pou bann gran shantyé Sin-Dni ? Domoun la voté pou sa ? Pa vré ditou ; li la mèm di li la port lo projé tram-trin, é kan la Réjyon la kas sa, moin la pa antann ali kriy bien for... pétète par sousi pou la démokrasi ? Si mésyé Victoria lété vréman sir d’li mèm, dan sète afèr, mi pans li nora fé dézord é nou noré antann.

Madam Ramassamy té fé lo vèr èl osi, mé èl lé dan la Réjyon, èl sré mèm lo promyé vis prézidant. Moin la zamé antann dir èl la lèv lo pti doi pou défann la géotèrmi, lo tram-trin épi d’ot gran shantyé. Aprésa, lé fasil dir èl va gingn trouv travay pou bann shomèr. Rant fèr avèk dir, nana in gran diférans... Final de kont, sé kant mèm Pierre Vergès ké la mète an plas bann gran shantyé la Réjyon, é kan li té pi dan la Réjyon, li la kontinyé soubate pou sa. Ala koman i fo fé.

La démokrasi i vé pa dir ditou fé konm l’autruche, kashyète out tète dann trou galé, mé vanj pou bann droi léjitime lo pèp.

Justin


Kanalreunion.com