Oté

La déstriksyon la natir, ankor pli shèr !

Justin / 28 octob 2011

Ankor in foi, dofé la pran dan la foré Maïdo. Ankor in foi, va fé déga vèy pa koman. Déga dsi bann pyé d’boi, bann ti brousaye, bann zèrb, déga dsi bann zoizo, an parmi bann tang, an parmi bann z’insèk... Lé bien domaz pars moin lé sir, sa i sava fé d’tor la biodivèrsité. I sava dégrade la natir. Lé domaz, fransh vérité ! Mé koman fèr pou anpèsh sak in pé i apèl l’insandi kriminèl ? Solon in pé, sa dmoun la mète dofé dan la foré. Désèrtin z’ofisyèl i domann mèm k’i dénons bann foutèr d’fé. Dèrnyé foi la fé parèy, mé la pa trap pèrsone. So kou isi, lé posib i trap pa pèrsone ankor in kou, épi dan dé-troi z’ané, dofé lé riskab ropète ankor.

Koman fèr pou anpèsh in n’afèr konmsa ? Mi pans pa demoun nana in komansmann solisyon. Dénonsé, mi kroi pa sa in bon z’afèr ! Espliké, i pé ète in bon z’afèr, mé lé pa éfikas san pour san. Arzout èk sa, désèrtin Rényoné i ésplinn k’i pran pa l’èr èk zot kan i fé kékshoz, konm lo park lé-o, konm lo park marin, konm d’ot z’afèr ankor. I pran pa l’èr èk zot, é pli pir ankor, i pran azot pou d’moun i koné pa arien ditou, dsi la foré, dsi la mèr, dsi la natir la Rényon. Pou d’moun kouyon, par l’fète ! Na in vyé dalon la di amoin in kou, tout sak i fé, sé pou anpèsh lo Rényoné an avoir in droi dsi la manyèr gouvèrn la natir dan son péi. Biensir, sa in l’idé k’i pé diskité, mé la pa in l’idé pou kapote dann kanal san fé in kont ansanm.

Kan dofé la pété, moin la pans in n’ot afèr. L’avé déza anparl sa dèrnyé foi, si mi tronp pa. Madam Dindar l’avé anparl baz in kanadèr La Rényon ; pa solman pou La Rényon, mé pou tout la réjyon, pars la pa arienk isi dofé i pran. Li pran galman dann Madégaskar, dann Sésèl, dann Komor ; donk, in pé partou ! Pou moin, sré in bon komansman pou lo ko-dévlopman. Va kout shèr ? Biensir, mé sanm pou moin, la déstriksyon la natir, sa i kout pli shèr ankor.

 Justin 


Kanalreunion.com