Oté

La fèrm poison dan la bé :
Ankor in filyèr la prodiksyon KO ?

Justin / 14 séptanm 2012

Dopi in bon koup de tan, kan mi dsann Plato-Kayou, mi rogard la fèrm poison. Dan mon tèt, mi oi bann poison apré soubat inn èk l’ot, naz par isi, naz par la-ba, pti, moiyin, gro. Mi oi dan mon tèt bann plonjèr apré nétoy lo basin, apré trap bann poison. Forsé, kan moin té i pas dann gran sirfas, moin té i louk dann réyon poison si l’avé l’onbrine élvé La Rényon, élvé Sin-Pol dan la bé. Souvan dé foi, moin té i oi pa arien. L’èr-la, moin té i pans avèk rogré, demoun té i fé pa sak i fo pou mèt filyèr-la anlèr.

Konm toulmoun, moin té i suiv la késtyonn rokin. Moin té i antan malparl Park marin, soidizan in gard manjé pou rokin. Moin té i pans osi, bann maléré té i pèrd la vi dan la mèr pou fé zot éspor, ou sinonsa sak i arsort éstropyé. Moin té i antann pa tro parl la fèrm poison, ziska nana dé somèn konmsa... In zour, mi antann in rovi d’près, é dann rovi-la, mi antan i di, pétèt sé la fèrm k’i fé vni bann rokin. Promyé débi, moin la majine té in kozman anlèr, konm sa, i port pa a konsékans. Mé moin l’avé konm in késtyon l’apré tarod amoin. Moin té i domann dan mon kèr si zournal la droit i soulèv sak li apèl in lyèv sré pa plito konm in komansmann kou d’poiniar dan la filyèr l’élvaz poison.

Pou kosa moin la pans sa ? Pars pétèt sa té i jèn in pé bann inportatèr poison, sak i fé vni poison san tèt isi dann gran sirfas, sansa poison i élèv dann Taïland, ou bien d’ot l’androi. Moin la kalkil osi, in pé i vé mèt la min la dsi, konm Téréos la mèt la min dsi nout sik. Pars, zot i oi, dopi in sèrtin tan, bann monopol an konplisité èk bann politisien la droit, an konplisité èk dé-troi l’éspri sinp épi d’ot ankor i sèy bat atèr nout bann prodiksyon.

Zordi i di, la fèrm i tak baro pou dé-troi rézon... lé pa tro valab. Mé lo vré rézon, ousa li lé ? Kisa nana intéré pou détrui nout filyèr l’élvaz poison ? Kisa i lé lo bra armé pou détrui filyèr-la ? Ankor in filyèr KO ? Lé pa posib kant mèm !

NB : Mésyé Patrick Hoareau, Diréktèr la fèrm, mèm si out kèr i singn, koz aou épi di la vérité siouplé !

Justin


Kanalreunion.com