Oté

La fèt sinoi, double dis (10-10) !

Justin / 10 octobre 2013

Bone fèt tou lé Sinoi.

Bann Sinoi là, kan zot la kit zot péi, la Sine, po alé in pé partou : té i parl pa boat people , té i parl pa bato i kit l’Azi, domoun la sap la gèr, an poundiak, famiy antasé konm zanimo !

Zot i sar rod si na travay, moyin viv, san d’mand la sarité.

Si zot i rapèl, lontan, dan tout ti koin na in boutik sinoi. Zot larivé é zot la vit rant dann komèrs, zot i kont si boulyé, zot rèstoran lé bien frékanté.

Zot té i déform nout lang kréol. Moin mi rapèl, ziska zot nom, nou osi nou té ginye pa pronons konm i fo.

Mazine, mèm ladministrasyon l’Éta sivil la transform zot nom…

An Polinézi, ou nana “Changue” po Sang, konbyin déformasyon isi mèm ?

Po pa oubli zot lang, mi rapèl zot té i sar lékol franko-sinoiz. Kan zot na 10-11 zan, zot i rozoign a nou dan nout kour élémantèr, nou na 8 tan. Zot fine aprann mandarin, ékri é lir an sinoi, zot lé an avans si nou, zot i koné in lang an plis ké nou.

La famiy sinoi solidèr. Sot la fine war in Sinoi fé la sarité si bor somin ? Sak na plis moiyin i èd son bann konpatriot, i done la min ansanm !

Zordi, zot rolizyon, zot kiltir lé konsèrvé dann koko, dann kèr bann zénérasyon ki vyin, zot i èd po lékonomi…

A moin, sak moin té i èm, sé zèf sinoi, in bonbon gro konm in bal ping-pong, lo gou sa lé inik. Mèm zordi, kan mi ginye lokazyon, mi asèt a li. I fé pans a moin mon zèn tan. La pétar i sar pété partou.

Fèt sinoi, obli pa ri kantoné, soté mine, poison zinzanm, pous banbou.

MMM… mon bous i fé d’lo : anon rèstoran manz pla o siav. Double dis !

Justin


Kanalreunion.com