Oté

La Fète la limyèr, é pa sète la fénoirsité !

Justin / 5 octob 2009

Kan in pé d’moun nana mové parol pou dir, sirtou bann parol la Droite la pli bète di mond, i mank pa in mikro byin akéyan pou rosovoir sa, épi pou fé profite tout sak i garde zournal télé. Dan la somènn, banna la fé koz in gran-grèk, l’UMP la oubli réformé méssyé Raoult. La fé koz ankor d’ote kalité anbobinèr, an parmi lo dénomé Virapoullé. Mi pans pa dan lo zanr lé possib fé myé. Plis la kord lé gro, plis li aral déssi, é plis li pans demoun i marsh déyèr li... i gob sa konm in pé té i gob zèf kri.
Donkalor, dan la somènn, na in n’afèr la kontante Virapoullé : la komine Sinpyèr la déside fé in gran fète Dipavali, pli gran ké sak va fé dan la komine Sintandré. Shakinn i pé anpans sak li vé… toulfason, pèrsone lé pa propriyétèr la Fète la limyèr. Mé lo mèrl moris la komine dé l’èst la kan mèm di inn-dé z’afèr solon son manyèr, son gro manyèr, dizon son manyèr grosyé.
Pou li, bann z’asosyasyon Sintandré lé zis kapab fé inn-dé sharyo tor-tor. Oui, zot la byin antann ! Sa lété di dann télé ! Lané dé mil nèf, bann tamoul Sintandré i gingn pa fé d’ote shoz ké sa. Ala in konpliman banna, mi pans, i oblira pa... Pou kossa li la di sa ? Pars, i parétré, la pa fé vnir bann z’ouvriyé indyin pou fé bann sharyo. Tansyon, moin lé pa kont bann travayèr z’indyin, pa ditou... mé i fé vintan i fé la fète Dipavali Sintandré, é si sak lo boug i di lé vré, mi domann amoin pou kossa la pa fé la formasyon, konm k’i fo, bann travayèr rényoné. Zot ossi na l’adrèss k’i fo, zot ossi na la foi néssésèr. Nou lé pa plis, nou lé pa moin ! Touléka, lé pa for pou in moun la fé toute son karyèr an bazan déssi Sintandré, pars si lé vré, sé son fote a li, an promyé...
Virapoullé sé Virapoullé, in kloun sé in kloun, mèm si sé in kloun mové fon... Mé moin lé sir, Dipavali sar in zoli fète, Sintandré, konm dan d’ote komine, é sar, konm d’abitide, la Fète la limyèr é pa sète la fénoirsité.

Justin


Kanalreunion.com