La fin d’lané lontan, sa té gayar !

A nou kan nou té pti, nou té i inm la fin dlané ; a koz ?

Lontan z’arab (èk sinoi) i anbal out marsandiz dan papié zournal ; mé la find lané, zot i done ; monmon i sar trap sa par paké ; mélanz la farine ek dolo po fé la kol ; dan la kaz an tol, i arplak zournal si tou lo kloizon toul tour ; sak lané davan fine nir sal, i wa pi lékritir.

I armèt papié név, lé blan, i éklate, i éklèr andan ; a nou ni lir : « France Dimanche ; Nancy bat Bordeaux 2 à 0 » ; ni wa zimaz traktèr, misline, lo trin, bato si la mèr ; ni voyaz dan nout tèt.

Koméla moin lé pli gran mi armazine pokoué toute son bann papié ? Kan ti kass la kaz po arfé in not, kan siklone i obliz a toué arkonstrui in abri pou ou bann zanfan, oui wa lo bann épésèr papié antasé in dizèn dané a suiv inn si lot, sa i fé a ou in karton dir po arasé, dir po désiré ; sé koué lo rol ? Zot i kroi sé riink po dékoré ? Po mèt la kaz an nèv ék tinoel i ariv ?

Non ditou ; lo papié léla po bous lo trou dann plans èk bardo, dan vié fèy tol siklone la fine anporté larrékipéré po arfèrm lo koté la kaz !

Po protèz la fré, lo van, limidité ; kalfétré anndan, la pli i tonm si la kaz an tol, anndan ou na la salèr familial.

Fin d’lané larivé, pétèt tipapa Noèl va aport inn ti balon, fé riin, lé mizèr, mé lo bonèr i tiin a riin, dé troi zournal prop kolé kont kloizon, si la piès an moulaz, lir an travèr, parfoi a lanvèr… la fin d’lané lontan dan la kaz i done a ou in lespoir, in zoi inn foi par an, kan i apros zourdlan ; aprè nora pétar ; sakinn son fèt ; fin dlané lontan, sa té gayar minm !

Justin