Oté

La fin di monde avan son tan, si Copenhague i trouv pa in bon solisyon !

Justin / 11 désanm 2009

Kan mi mazine bann kapitalis épi koman zot l’apré sassine la tèr par rapor zot gourmandiz larzan, sa i fé pans amoin in tèks nou té i lir kan nou lété kour moiyin. La pa yèr, oui mon fra ! Dizon, pou moin, sa té i apèl "lo mandyan Pépik". In zour, li pass koté magazin in gro vaza. Lo boug l’apré souplégné, pars mèm li lé rish, la vi na poin, pou li, ni gou, ni santiman. Mèm son l’or i di pi ali aryin.
Pépik i di lo boug, an parlan par réspé, pou son par, l’or sré in bon n’afèr pou li, i kontantré ali byin. Lo vaza i di ali : « Bin lé bon ! Pran toute sak ou nyabou d’porté ! ». Li trap, li mète dann son sak, li trap, li mète dann son sak, li trap... ziskatan k’son sak lé tro lour, li tonm, lo san i sorte dann son boush... lo boug lé mor définitivman.
Kossa bann kapitalis l’apré fé avèk la tèr pou goumante zot pla ? Zot i ésploite, zot i ésploite, zot i ésploite... zot i polyé mèm ziskatan zot lé riskab tyé zot sistèm, kine z’ot poul i ponn zèf an or. Pou moin, zot lé konm Pépik, kan zot va rann azot konte, zot kanar sar fine pli noir k’lonoir. Lé parèy Pépik ?
Non, malérèzman, pars si lé té sa, noré té bon, mé sé bann pov k’i sar pran lo shok an promyé, sé bann zanfan va mor d’fain an kantité, sé bann péi tro plate va disparète... l’èr sar tro sho, la mèr va monte tro o, lo klima va vni fou... dizon la fin di mond avan son tan, si la-ba Copenhague, i trouv pa in bon solisyon !

Justin


Kanalreunion.com