Oté

La formasyon bann stajyèr :
Mi pans pa i vé fé lo Sarko san Sarko ?

Justin / 20 juillet 2012

Mi koné pa si zot lé fine antandi konm moin, l’édikasyon nasyonal la France lé pa si tèlman gabyé ké sa. La prèv, kan i fé in klasman, kisoi an parmi bann péi l’Erop, kisoi dan l’OCDE, ou i trouv pa la France an tèt dan lo klasman. I parl souvan la Finlande, sansa la Suède, sansa d’ot péi ankor, mé i anparl pa l’ékol fransé konm in l’ékol kalou ; i di, li sé lo l’ékol lo pli mal ankadré, èk in bann amontrèr mal péyé, sé galman lo l’ékol nana lo pli mové rézilta an parmi lo trann-kat péi l’OCDE. Sa i anpèsh pa bann minis bat dsi l’éstoma. Sa i anpèsh pa in pé kroir l’ékol fransé sé in modèl k’i fo suiv pou toulmoun.

Ala pou kosa, kan moin la antann madam Penchard apré di i fo bann amontrèr stajyèr i sava aprann zot métyé dan la France, moin la touzour majiné, si i fo alé dann in péi pou myé aprann amontré, i vo myé évit la France èk son l’ékol andikapé. Mé madam Penchard, l’ansien minis bann péi l’Outre-mèr, té i pans nout bann éstajyèr té i doi alé la-ba. Lo nouvo minis la konm di apépré lo mèm z’afèr. Pou li, i fo alé déor pou myé aprann amontré, é déor ousa ? Déor dan la France. Si tèlman, shak ané bann stajyèr i manifès, in pé mèm i profèr kit l’édikasyon nasyonal. In pé i sava, é kan zot i rod artourné, baro lé také.

Mi sort lir dann zournal, arien k’bann la Martinique la domann bann jène i fé zot staj shé zot, é a s’ki paré, gouvèrnman i di pa non. I di osi bann dépité rényoné i oi pa in l’inkonvényan pou anvoy nout jénès la-ba. Donk zot lé pa kont lo shartèr bann amontrèr déor i ariv isi shak ané. Donk zot i kas pa la tèt pou nout bann jène la gingn konkour... Mi pans i komans mal so mandatir-la, pars konm k’i diré, i arsanm pa bann dépité péi i sousyé nout jénès, i sousyé nout péi. Nou lé kapab ? Bien sir, ni pans nou lé kapab. Mé gouvèrnman épi bann dépité, moin lé pa sir zot i pans nou lé kapab. Mi pans kant mèm pa zot i vé fé lo Sarko san Sarko ?

NB : OCDE (Organisation de coopération et de développement économique) comprend trente-quatre pays, la plupar lé dévlopé. Cet organisme international est chargé d’études concernant la coopération économique.

Justin


Kanalreunion.com