Oté

La Frans épi son Triplé A : Rézin-la lé tro vèr, lé bon arienk pou bann goulipya !

Justin / 17 zanvié 2012

In nuit, la somènn pasé, mi lèv. Mi pans, in bann dalon la fé la fèt par koté la kaz épi la kass mon somèy. Zot i koné, kan la mizik i fé bou-bou-boum ! Kan demoun i kri konm kan i tyé koshon ! Kan lo shien i mèt pou aboyé ! Si out somèy lé in pé lézé, in pé konm somèy lyèv, dé foi i fé lèv aou. La pa sa mon problèm ; Ala ké mi rouv télé, par abitid, pou oir si na in nouvèl pou aprann. Ala ké mi aprann, in l’azans notasyon, S&P, la dégrad in kran la not la Frans.

Astèr-la, i antann tout kalité komantèr. Mèm in l’ékomis l’avé di, l’ékonomi la Frans lé tro for pou dégrad son not, i koz olèrk alé kashyèt. Bann zonm politik, bann zournalis la trouv in kékshoz pou di — san mèt a profi lo patoi Gustav Parking k’i di konmsa : « I vo myé fèrm son také é lé riskab demoun i pran aou pou in kouyon, ké rouvèr son boush épi tout demoun i apèrsoi ou sé inn pou vréman ! » ; Mèm in minis la trouv lo tan di dé parol... in minis mi èm bien ;

Lo mèm la di, l’ané 2005 par-la, shikoungounya sé in sinp grip. L’èr-la li lété sogrétèr pou l’outro-mèr. Ala kosa li di : ou i sava l’ékol é ou i gingn 20 sir 20, ou in bon z’élèv ! Si ou i gingn 19 sir 20, ou sé touzour in bon z’élèv. Konm La Fontaine té i di, dann in fab “Lo ronar é lo rézin” : « Rézin-la lé tro vèr, lé bon pou bann goulipya ! ».*

* Konpèr ronar i oi in ta grap rézin mir vèy pa koman dsi in tonèl. Li vé kapay inn-dé pou manzé. Li sot, li sot, li gingn pa trapé. Li abandonn lo konba épi, la ké rant son pat, li di kozman moin la ékri anlèr-la. I pé di galman : Akoz an avoir in Triplé A ? I sar pa bazar èk sa ! Mésyé Fillon, pou son par, i di, i fo li rann la Frans son Triplé A ! Afèr rann anou in n’afèr i ansèrv de riyin ? Pétèt i fo tourn sèt foi la lang dan la boush avann kozé ? Mi pans sa i pé sèrvir !

 Justin


Kanalreunion.com