Oté

La gouyav de franss lé vèr !

Justin / 27 févrié 2016

Mwin lé fatigué antann di konm sa “La Rényon, domoun i vé pa travay“, “Isi nou na bo rodé ni trouv pa sak nou na bozwin“, “isi na pwin moun néna diplom“, ousinonsa “dan lo dominn ni vé, ni rod ni trouv pa“, ousinonsa ankor “dan la éspésyalité na pwin“. Sanm pou mwin sak i di sa i mank a nou réspé pou vréman. Donkalor nou lé ziss bon pou ramas réstan ? Mwin lé sir néna i sar di Justin i inm pa domoun déor, Justin lé égzénofob, li inm zis son moun a li tousala. Koué ou vé ?

Mi lir zournal, mi akout radio, mi argard télé, Kosa mi apran lèr la ? Lo mèr la posésyon, la éspésyaliss gouyav de franss la parti rod in diréktèr la kominikasyon la ba déor, dan lo nor i di. Mi di lo mèr sé in éspésyalis gouyav de franss vik sé pa promié fwa li sar rod déor. Alorss, mi poz in késtyon, èské avan alé rod déor, la argandé si néna isi ? Di pa mwin lavé pwin, vik lo bononm la gingn la plass mi koné a li byin minm, vik nou la travay ansanm mandoné.

Alorss shant pa mwin midi katorzèr. Ogard ousa nou lé randi mézami ? Mi pé témwanié zordi, konm sa nou néna isi, nou néna an poundiak minm. Bak plis5, plis6, plis 7, mi koné minm néna plis 10. Sanm pou mwin ni pé trouv mié isi pou pa pli shèr. Mwin na in dalon li osi li na in pé la bèk, si ou vé la lang lé in pé délié, li koné osi lo boug, li di a mwin konm sa “Si ankor li té nésésèr o bon fonksyonman nout péi“ I di lo mèr la shwazi a li parské li lé vèr !


Kanalreunion.com