Oté

La grèv kouran ? Négosyé pou trouv in bon solisyon

Justin / 5 zanvié 2011

Matante Zélida la ékrir Justin :
Mon shèr nové, mon spès salté,
Alor, éstèr i déside mète demoun dann fénoir ! Ala k’i déside koup l’éstrésité ! Bin, i pans pa l’moun don ?
Fé la grèv, oui. I pé di sé in droi, mé pou annuir lo moun konmsa ; Fransh vérité, si té aryink de moin, moin noré di toulmoun tinn toute limyèr, ansèrv pi kouran. Konmsa bann grévèr sar byin atrapé. É pou zot larjann moi, zot va fé sintir. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin na konm l’inprésyon ou lé an kolèr. Mi konpran pa pou kossa, pars si mi suiv aou bien, ou lé près paré pou déklansh in grèv konsome kouran. In grèv konsomatèr, sa lé rar konm korn lapin. Donkalor, grévé é domann demoun pou grévé, si ou i vé !
Solman, m’a dir aou in n’afèr sinp. In grèv i ansèrv de rien si sa i annuir pa d’moun, i ansèrv de rien si lo patron i ranpli son pla san problèm. Mé dann in grèv, na dé : in patron é bann travayèr. É, souvan-défoi, i fo komans la grèv pou gingn négosyé ; Négosyé pou trouv in bon solisyon.

 Justin 


Kanalreunion.com