Oté

La guèr pou arien ?
Sof pétète pou dominé, pou ésploité !

Justin / 16 juillet 2011

(page 16)

Mi souvien lo tan demoun té i nonm l’Amérik, konm zandarm le mond. Lé vré, dann tan-la, l’Amérik té i amène in bonpé la guèr. Zot té i prétan d’ète lo shanpyon la liberté. Sé konmsa ké li té i soutien in takon la diktatir, dann l’Amérik latine, dann l’Azi é mèm dann l’Afrik. Mé, fransh vérité, dann l’Afrik té plito bann z’ansien péi kolonyal té i zoué zot rol... Dann tan-la, lété lo tan la guèr froide, é bann péi kapitalis l’oksidan, té i anpar la plui avèk paraplui bann zamérikin. I fo dir ossi, dann tan-la l’Amérik té promyè péi di mond pou son l’armé, pou son lékonomi é pou son sèrvis polis sokrète (la CIA) té mayé partou.

Dépi tan-la, kominis lé batu é bann péi lo blok kominis lé dann kan kapitalis. Donk, sa i vé dir, na pi d’rézon pou fé la guèr. Na pi d’rézon pou atak in péi, atak in n’ot. Mé, pou tout sak i vé rogard avèk zot zyé, i diré bien, koméla na plis la guèr ké lontan. Si sé pou défann la libèrté, i fo kroir la libèrté zordi lé pli ménassé ké zamé. L’èr-la, l’Amérik i vé pi mène la guèr tousèl, i aral in bann dalon ansanm... konm l’Anglétèr, l’Itali, la Frans, lo Kanada, l’Ostrali, étsétéra-étsétéra.

Solman, d’apré sak mi oi, la pa moiyin obliz bann péi aksèp la liberté, avèk la démokrasi, sof si bann péi épi bann pèp i vé bien par zot-mèm. Zordi, i di konmsa, bann z’armé étranj i sava sort l’Afganistan, i sava sort l’Irak. Zot va sort la-ba an vinkèr ? Zot va sort la-ba léstoma bonbé an vantar ? Non, la plipar d’tan zot va sort la ké rant zot dé pate, an vinki. Zordi i koné déza, bann taliban i fé près tout sak zot i vé, san kass la tète pou bann solda étranj lé bazé la-ba. Na dé-troizour Sarkozy la parti fé lo fyèr la-ba, é kan li la parti bann taliban la tyé sis solda pou bien amontré kissa k’i komann. Donk lé prèss sir bann guèr-la, sa i ansèrv de rien. Poitan na solda i sava mor la-ba. Poitan i sava tyé d’moun dann bann péi-la. Alors, si na poin léspoir pou mète anlèr la liberté kossa k’i sava fé la-ba ?

Dépans larjan, fé mizèr d’moun, tyé bann solda, dévast lo péi. Pou koué ? Pou arien ! Sof pétète pou dominé, pou ésploité.

Justin


Kanalreunion.com