Oté

La klé dann tousala : In nouvèl gouvèrnans !

Justin / 4 novanm 2009

Akoz fé in n’afèr sinp kan na moiyin fé in n’afèr konpliké ? Touléka, mi pans l’éspri bann gran grèk, sak la anpil koush par dsi koush bann z’institisyon, l’été in bon pé anbriyé. Donkalor kan i vé fèr in n’afèr, dann in l’androi, étone pa zot si i fo dossyé i pass avèk inn, i pass avèk l’ote, i pass avèk in troizyèm, i bate in karé. Paris, avann fé in détour par Briksèl. Alors, dann tousa, la vitèss nana son tan. E konm di lo konte, dé foi, kabri i manz salad.
Dépi lindi déssi radyo KOI, i diskite déssi lo mank l’anploi, é konm bann z’oditèr, la mazinasyon lé for, i trouv solissyon... Pars, sak mi rossan sé k’in bon pé d’moun i fé travay la tète déssi késtyon-la, é bann sak i s’anfoutsa lé pa nonbré déssi in késtyon konmsa. Nana ossi sak i donn z’ot l’idé déssi, lo manyèr pou trouv l’arzan pou donnn kréol travay.
Sa lé byin bon ! Sof ké na in problèm pou trouv la solissyon. Kalkil byin ! Si i trouv bon solissyon, si i déside aplik azot, mé kissa va aplik sa ? Nora in sèl l’institisyon, nora plizyèr ? Toute v’alé dann mèm sans, sansa inn va ral in koté é l’ote va ral l’ote koté. Dizon, ni artrouv lo pli gran problèm, la klé dé shoz, sak lo prézidan li mèm i apèl in nouvèl gouvèrnans.

Justin


Kanalreunion.com