Oté

La klimatizasyon èk lo d’mèr ?
Pti lanp-pti lanp, l’otonomi énèrzétik va arlèv la tète !

Justin / 23 avril 2011

Konm di lo kont : « Souvan dé foi, lé dir pou zoinn lé dé bout par l’milyé ». Sak i fo fèr, dann in ka konmsa, sé, si ou i gingn, dépans in pé moins, sansa mète in pé plis larzan. Lé fasil pou dir, lé dir pou fèr... mé a sipozé ké lé possib, sa in prinsip i vo pou tout sort shoz ; I vo ossi pou lénèrzi : i pé produi in pé plis, é tiliz in pé moins.

Kan Konsèy réjyonal la fé in plan pou l’énèrzi, li la fé in l’éfor déssi lékonomi. Sé konm sa ké la déside ède demoun mète shof-lo solèr in pé partou. Sé konmsa zordi nana plis san mil shof-lo solèr, é i pé mète ankor in bonpé sof si i fé konm la fé dépi la finisyon l’ané 2010, diminyé l’ède, mé ni pé éspéré plan-la va arpran in nouvo dépar, kansréti si i arshanj gouvèrnman ;

Sak i pé fé avèk le sho i pé ossi fé avèk le fré. Sé konmsa ké la CINOR la déside klimatiz bann batiman piblik avèk lo fré i pé tir dann fon la mèr, é si lé shoz i avans konm lé prévi la finn l’ané 2013, va nyabou trouv lo bout la shalèr dann bann batiman piblik, san domann siouplé l’EDF, é sirtou san tro gonf son pla.

Dizon, pou bidzé bann koléktivité, sar in bon n’afèr, mé la pa tousala, i fo pans ossi bann demoun i touf avèk la shalèr dann zot kaz, é souvan-défoi na poin kansréti in vantilatèr pou soulaz azot in pé. Arzout èk sa la limyèr piblik, la-dan ossi na moiyin fé lékonomi, é mi kroi pa bann demoun i pèy l’inpo noré a rodir pou in n’afèr konmsa. Zot va oir, malgré la dépitasyon demoun gro-kèr, pti lanp-pti lanp, l’otonomi énèrzétik va arpran favèr.

Justin


Kanalreunion.com