Oté

La komine konm amortisèr sosyal ? Amortisèr...erè !

Justin / 16 avril 2014

Dopi kék tan, mi pans in mo. so mo - la sé amorti. Mi pans zot koné kosa i vé dir "amorti". L’amortisèr in moto i ansèrv pou diminyé lo shok... Dann foutbal, i pé amorti balon, kisoi dsi léstoma, kisoi ankor par lo pyé konm kan Zidane i manyé son pyé konm in min é balon i rès kolé dsi son pyé. Donk amorti, dann foutbal, sa i vé dir diminyé la vitès lo balon ziska arèt ali près pou amors kisoi in l’atak, kisoi in kontratak, kisoi oryant lo zé in n’ot manyèr. Moin la antann in ga té apré di i fo amorti la vyann donk atandri ali. An pliské sa, iantan plis-an-plis parl amortisèr sosyal.

Moin lé sir dann zéléksyon minisipal na in bonpé kandida té i vé la komine i ansèrv l’amortisèr sosyal pars l’éta i tap tro dir é na demoun i rès dsi l’bor shomin konm madam Girardin té i di. Donk in pé té i pans amorti la kourb shomaj, amorti lo bès lo pouvoir d’asha pars l’éta lé pa la èk sa é li vé sirtou diminyé la dète mé sa lé pa sans konsékans dsi lo nivo d’vi demoun, dsi lo l’aktivité ékonomik, dsi bann z’avantaj sosyal. In pé i fé roviv bann métod ansien konm distribyé lo bon l’èd sosyal - mi antan dir Sint-André i vé fé sa. I sèrv ar pa rien, va fé konm dolo dsi la plime kanar é inn foi lo bon la fine ariv dann tiroi-kès lo komèrsan va rès arienk pou aspèr lo proshin bon si li ariv, épi ète zantiy èk mésyé lo mèr, épi vot pou li, pou son tandans, méfyé l’opozisyon é bien rogardé avan di bonzour in moun.

Tousa pou koué ? Pou zoué lo ro amortisèr sosyal ? Alé oir gouvèrnman l’apré iz bidzé kominal, alé oir lo rannman l’oktroi d’mèr va diminyé dann lo troi z’ané k’i vien. Alors, kèl rol amortisèr sosyal bann komine i pans zot i sava zoué. soi i sava fé dépans sosyal an plis donk diminyé l’invèstisman, soi mète lo kont la komine dann rouj, soi ankor ronons lo bann promès la fé dann la kanpagn épi fé konmsi, foutor, in mirak i pé arivé - in mirak la pa fé pou lo shien, foutor d’in sor. Sanm pou moin sak i kroi goumant son rol amortisèr sosyal li tir li mèm in bal dann son pyé.

Konm bann ti marmay téi di lontan "amortisèr..erè !"

 Justin 

NB : lo"erè, sé pou amontré ké ou i kroi pa sak i di."Erè" i fo di avèk lo ton k’i fo,obli pa !


Kanalreunion.com