Oté

La kominikasyon... É tanpir si lo péi i pran lo fon !

Justin / 16 novanm 2010

Na in patoi di : « Ou i mète in bourik atlé avèk in kalèsh, li pran ali pou in shoval ! ». Mi pans sa lé bon pou signal lo tourné-viré bann Didier Robert la-ba dann l’Australie.

Lé dir pou nou Rényoné !
Sak la spasé lé dir pou nou Rényoné k’i vé mète nout péi anlèr, k’i sèy fé byin oir ali. Mé ala k’in délégasyon i sava dann in gran péi i apèl l’Australie. Ala k’i dépans in kantité larzan, avèk in gran prétansyon vi k’zot i vé fé in gran léspass l’oséan indyin. Bon plan pétète ! ankor i fo oir koué i mète dedan é sirtou koman i amènn lé shoz konm k’i fo. Zot ? Zot la fé sak zot i koné fé, la kominikasyon. Maléré sor ! Bann z’australien la aprann sa dann zournal. Dézord la pété dan la kour. Bann z’australien la foute anou in volé, vèy pa koman… in rashmann kèr ! Lir “Témoignages” yèr, zot va oir. Agarde ossi lo site linfo.re épi d’ote sours.

Konsèy réjyonal avan nora pa fé konmsa
Moin lé sir, zordi, in bonpé d’moun i rogrète lo tan lo Konsèy réjyonal té kapab amène lé shoz konm k’i fo. Pran pasyans, épi kan l’okazyon lé bon, fé avans in pion ; Nou la avans bonpé dann tan Paul Vergès lété prézidan, é mèm avan. Avèk in zyé o zour lo zour é in zyé pou rogard l’avnir. Zamé avèk lo Konsèy réjyonal avan, dé shoz parèy nora spasé. Arzout èk sa, nou Rényoné, nou la pèy dé-san-karant troi milyon pou boir la tass konm sa… pou gingn in batlavé parèy. In zoli rézilta an vérité !

Final de kont, Didier Robert, sé la voi d’son mètr. La kominikasyon, la kominikasyon, ankor la kominikasyon. Tanpir si lo péi i pran l’fon.

Justin


Kanalreunion.com