Oté

La kominikasyon la Réjyon ? Sa in vilin défo, pou vréman !

Justin / 7 octob 2010

Dann la kanpagn pou zéléksyon réjyonal, l’Alyans té i di : « Ni fé sak ni promète ! » é lété vré pou vréman.

Zordi la byin shanjé !
Koméla, lé shoz la bokou shanjé. La parol, souvan défoi, i ranplas l’aksyon. I prétan dir sa i apèl la kominikasyon. Moin sré plito tanté d’dir sa i apèl sharj de lo. La pa di la Réjyon té i sar fé in rézo dé mil bis pou siyone La Rényon long-an-larj, pou alé ziska dèrnyé gafourn nana dan nout péi. Pou sa té i sava ashté lo bis, an kantité, té i sava ossi anploye plis kat mil shofèr, é koatéra. Mé aprésa, la di sé d’moun la pa byin konpri.

La route litoral konm térin la krak !
So kou issi, l’apré amiz la boush kréol déssi la rout litoral sis voi. Mé lo métode lé in pé drol. Avan an avoir fé zétide séryé, i balans in pri… mé i agarde pa byin si sa lé fézab, si sé lo méyèr z’afèr pou fé. Apré sa ankor va oir lo pri i sava kouté. La pa konmsa k’ifé. I ansèrv sa konm plan la kominikasyon. Bate la lang i angaz dé riyin. La route litoral i ansèrv térin la krak.

Pandann tan-la, lo tan i pass. Shomaz i gangrène la vi d’moun. Ni oi byin kosa k’i kass, ni oi pa ditou kosa k’i fé. Ni fini par pans, la kominikassyon solon banna-la, sa ankor in vilin défo.

Nb : In gafourn, sé in l’androi lé loin, lé dir pou arivé.

Justin


Kanalreunion.com