Oté

La konsidérassyon vant-vide, sa i ansèrv ariyin !

Justin / 31 zwiyé 2009

Nana in bon pé d’moun i pans, i fo mète la kiltir anlèr. In pé i di mèm, la kiltir sé in poto lo dévlopman dirab an parmi lé katr : lé troi z’ote poto sé lékonomi, lo sossyal épi d l’anvironeman... I fo konte galman avèk la solidarité nana rant tou lé kat... In pé i apèl sa la « synèrgie ».
Mé koué k’i vo in kiltir si li la poin in bann zarboutan pou porte ali, dizon pou fé tyinbo la kaz deboute. Kisoi bann shantèr, kisoi bann mizisyin, kisoi ankor bann poèt, kisoi demoun i fé téat, demoun i fé bann éstati épi toute sort z’afèr nana, konm di lo kont, in valèr kiltirèl.
Alors, mi kalkil, souvan-dé foi, koman la vi lé dir pou bann z’aktèr kiltirèl. In pé i di k’sa sé z’ot tan vash mèg. I di mèm zot l’apré manj la vash anrajé…
Donk, solon moin, la sosyété i rokoné pa lo mérite bann z’aktèr kiltirèl, si èl la poin la rokonéssans k’i fo, pou sak zot i fé. Pou moin, l’èr l’arivé pou pran konsidérassyon pou zot épi pou trouv in manyèr fé viv azot in pé myé : dann sak zot i fé lo myé, dizon z’ote prodiksyon kiltirèl. San raz z’ot pinte sirtou !
Pars zot ossi, zot sé bann z’ouvriyé lo dévlopman dirab, é la konsidérassyon vant vide, i ansèrv ariyin.

Justin


Kanalreunion.com