Oté

La kontinuité ? Sa lé bandé sa, fransh vérité !

Justin / 3 désanm 2014

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
M’a dir aou franshman, Didier Robert, sa in onm pou vréman. La prèv ? Li sort rédi lo rin dann séna avèk lo gouvèrnman dsi la késtyonn la kontinité téritoryal. Li la di gouvèrnman tir pa larjan la dsi, mé trap larzan in n’ot koté si li vé. La majorité bann sénatèr l’aprouv ali. Sé dir si li na rézon ! Pars bann sénatèr la pa bann marmay lékol. I pé pa fé prann azot blan pou noir, makaroni pou la bouji. Li la réklam nout droi pou alé dan La Frans, kansréti in foi par an. Nou lé bien èz rann vizit nout mèr patri kant mèm la di. Sak i vé pa alé, i sar pa ! Moin pèrsonèl moin la poinn rézon pou alé laba, vik moin la poinn zanfan laba, mé mi pans sak nana. Mi pans mon kamarad ! Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, m’a rakont aou in zistoir. Mi arvann aou sa konm moin l’ashté. An parlan la mèr patri, nana inn foi dé nouvo maryé la désid fèr in kroizyèr tou otour la mèr méditérané. Solman oila, lo dépar téi done Marseille. Donk, zot la pran dé biyé l’aviyon alé konm rotour dopi isi ziska La Frans épi zot la pran dé biyé pou fé la kroizyèr. La bien spasé pou zot : zot la pass por an por toul’tour la mèr. Aprésa zot la rotourn Marseille épi zot la roparti Zilo avèk, konm di lo kont la tète ranpli bann souvnir. Sa té in kou d’kontinuité bandé ! Pars Konm zot lété bien roganizé zot la pass solman dé morso d’zourné dsi lo téritoir la mèr patri. Pars konm zot la di, La Frans i intérès pa zot pou vréman… M’a dir aou in n’ot zistoir. mi koné in madam i travay fam de ménaj shé in famiy profésèr. Madam profésèr, mésyé profésèr, Shak vakans zot i sar oir zot famiy épi zot i amenn zot fam ménaj avèk zot. Tousala i gign la kontinuité ! Mésyé li ; madam li ; marmay li ! Lo fanm ménaj li... Inn shans pou la fam ménaj ! Sof ké pandan lo vakans èl i kui manjé pou la famiy épi pou lo zinvité, èl i ropas osi pou pa pèrd la min. Tan k’à fèr èl i fé lo ménaj pou progrès dann son métyé. Konm di lo kont, ala in éstratézi gagnan-gagnan. La kontinuité ? Sa lé bandé sa ! Fransh vérité.

Nb : In kozman pou la rout « mi vann aou sa konm moin l’ashté ». Sa sé lo ka, demoun na poin in l’informasyon promyé min, alor zot i rakont sinploman, zot i pran pa dirèk lo résponsabilité. La pa konm i di « l’om la vi l’om, la vi l’om, la vi l’om la vi l’ours ! » mé i arsanm in pé. Dizon sé konm in la di la fé. Lé pa mantèr, i pé z’ète vré, i pé z’ète osi aranjé. Alé, zot osi fé travay zot koko, fé bouy in pé zot matyèr griz, moin lé sir zot va trouv do koi pou dékor lo kozman moin la di a, o la.


Kanalreunion.com