La kouyonis, mi pans sa na poinn bor !

I paré, in kronikèz i apèl Emilie Albertini dann in télé l D8 la donn in drol lésplikasyon dsi l’atak bann rokin dan La mèr la Rénion. El la di a popré kékshoz konmsa : demoun i jète bann karkas zanimo dan la mèr é bann rokin i vien manzé, é konm na pi tro poison dan la mèr si lo rokin i trouv in surfèr li atak. In drol lésplikasion bien antandi, sirtou ké ni koné la pa arienk bann surfèr lé ataké.

L’èr-la, in pé i mète a fé lo buzz dsi internet épi zot i domann lo diréktèr lo D8, épi la kronikèz éskiz azot, domann pardon La Rényon... Moin pèrsonèl moin la pa bézoin zot i domann amoin pardon, pars mi san pa moin ataké. Mé si na in pé i vé i domann azot éskiz é bin shakinn lé lib..Konm lo tantine la pa blijé éskiz ali… si shak foi k’in kouyon i di in kouyonad i fo li sar domann éskiz é bin, sanm pou moin, moityé d’lo tan li pass a di bann kouyonad é moityé d’lo tan li pass a domann éskiz. Sirtou dsi la késtyonn rokin, pars mi an souvien bien la di tout z’afèr la dsi.

Na in sèrtin mérès la di, él i koné La Rényon, vi k’èl lé né isi, é la pa in bann rastakouèr va amontr ali rokin. Mi dout pa èl i koné désèrtènn shoz dsi La Rényon, mé mi pans pa èl sé in éspésyalis rokin.Koméla, èl i di, sa in késtyon difisil, la komine la fine dépans in takon larzan la dan, donk èl i koné pa si pou finir va trouv in bon solisyon. Mi pans, pou èl, lo dépans i ansèrv arienk pou boush lo také bann moun gran guèl mé o fon, konm i di, di fon mistèr ék boul de gom.

Nana sak la di la fèrm poisson lé résponasab bann zatak rokin. La fèrm la fèrmé, mé lo danzé rokin lé ankor la. In pé la di la vyann demoun lé fad é rokin i èm pa sa. Na d’ot la di i fo tyé lo bann rokin. Na mèm in mèr la pran i larété pou rouv la shass rokin.In pé la di lo park marin lé résponasab bann zatak rokin... Tousa pou dir : rokin i atak demoun lé bien maléré pou l’moun, mé pou kosa zot i atak demoun ? I koné pa bien... Moin mi kroi la syans, kisoi la syans bann péshèr rényoné kisoi la shans bann shèrchèr, sak nana isi, épi sak nana an déor. Mi dout pa ké va trouv lo tik-tak in zour, mé zordi la pankor trouvé, mèm si i rod ali konm l’aviyon la pèrd.

Sé pou sa, mi pans na ankor la kouyonad pou di la dsi, é la kouyonis, mi pans sa na poinn bor.

 Justin