Oté

« La lang sé lo méyèr é lo pli mové z’afèr ké nana ! »

Justin / 17 out 2016

Mi pans zot i koné Esope ? Sa té in zèsklav dann tan l’avé z’ésklav dan la Grèce. Mé d’apré sak i di té in moun i koné bien la vi, in l’éspès moun saj. Donk in zour son mèt i di ali : « Esope ! Zordi mi vé manz lo méyèr kari ké nana ! ». Esope i sava bazar épi li ashète la lang pou fé kui. Landomin son mète i di ali : « Esope, mi vé manz lo pli mové kari ké nana ! ». Lo ga i arsava bazar épi li ashète ankor in kou la lang pou fé kari. Son mèt i di ali : « Moin na konm l’inprésyon ou i mok de moin la ! ». Lo z’ésklav i réponn : mi mok pa d’ou, moin la, mé kalkil bien é ou va oir : la lang i gingn di bon z’afèr avèk sa, zoli parol, konpliman, mo d’amour, mé avèk la lang ou i pé vann out famiy, vann out patri galman. Donk li lébien bon, mé li pé mové, danzéré pou d’bon. Ala pou kosa mi pans li sé lo méyèr é lo pli mové z’afèr ké nana. Alé ! Ni artrouv pli dvan.


Kanalreunion.com