Oté

La lang sé promyé prèv jéni in pèp ! I dire in pé i gnor in n’afèr konm sa !

Justin / 10 novembre 2010

Matante Zélida la ékrir Justin :
Mon shèr nové, mon spès salté,
Mi pé dir aou, moin la pans aou dimansh. Moin la pans aou épi toute bann lintérésan rouj-de-fon, kan moin la lir in lartik dann zournal de lil. Son tit : "Kréol KK". A ! I pé dir moin lété kontan ! Pou kossa ? Dabor pars sak la ékri lo lartik sé inn grann dam la shanson, madame Zakline. Dézyème z’afèr la rann amoin kontan, èl la ékri inn-dé fraz an kréol. Oté Baba, sa lé té zoli ! Si tèlman k’noré di sé d’fransé. Té i rosanm, konm in goute delo i rosanm in n’ot goute delo. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi pé dir aou, moin lété pa kontan ditou k’i maltrète konmsa nout lang kréol. Kossa ? Nout lang kréol sé d’kaka. La lang mi antan dépi moin lé dann vant mon momon sé d’kaka. Fransh vérité, moin la santir amoin insilté é pa aryink in pé ! Akoz ? Pars madame Zakline, lé pa n’inport de ki. Konm vi di, vou mèm, sé inn grann dam la shanson kréol an kréol é an fransé. Alor, kan in moun konmsa i pran la pène trap son plime pou insilt nout lang, mi pé pa z’ète kontan. Dimansh-la té in zour trist pou La Rényon ! Inn an parmi son zanfan la vomi do-lé li la tété. La vomi lo lé nout rényonité.

I fo dir ossi, la pa si tèlman sa fote. Mi pans èl lé kontaminé par déssèrtin i kroi pa dann lo jéni nout pèp. La lang kréol rényonèz, sé promyé prèv jéni lo pèp rényoné !
In pé i gnor in n’afèr konmsa.

Justin


Kanalreunion.com