Oté

La lé grav la !

Justin / 17 séptanm 2010

I prétan dir méssyé Sarkozy i sava Bruxelles pou ésplik in pé lé shoz déssi la késtyonn bann Rom. Pétète, li pans bann péi déor i konpran pa byin son politik. Donk li sava pou éspliké. Mé par l’fète kossa li sava éspliké ? Li sava dir la ras bann Rom té pou aryin dann désizyon son gouvèrnman. Pétète li sava ésplik banna zot la pa byn ékoute ali, zot la pa byin konprann ali.

Lé dé komik la mal éspliké ?
Poitan li la fine anvoy dé komik la-ba Bruxelles pou ésplik lé shoz. Dé minis siouplé, minis l’Émigrasyon épi minis l’Intèryèr la fine alé, la fine kozé, la fine di gouvèrnman i fé parèy avèk toute sak lé pa an Frans dann la légalité. I fo dir, lé dé konpèr, la obli parl la sirkilèr lo minis l’Intéryèr, sak té i mète par troi foi lo doi sou l’né bann Rom, dann in tèks in paz... Lé vré ké minis l’Intéryèr la fine shanj son sirkilèr mé li la di ossi son politik i shanj pa : mor-pou-mor, li vé kass-brizé lo kan bann Rom !

Mi pans pa li sava di sa ?
Mi pans pa li sava di banna, si li la fé sa, sé pou sifone bann voi lo Fron nasyonal. Poitan sé pou sa ! Pars komsa mèm li la fé lané 2007, kan li la prétann nétoiye la banlyé kout karshèr. Poitan sé sak toute bann politolog la di, é toute lé dakor èk sa. Alor, koman li sa pass la pintir déssi la komissyon éropéène ; koman li sa fé prann azot po d’shanm pou pla kouvèr, makaroni pou la bouji, savon pou fromaz ? Sansa, pétète, domann azot solman pou fé sanblan, pou di toulmoun lé bon, toulmoun lé zantiy. In bon foto la dsi, avèk bann dan byin blan é in bann boush apré di : « rougay sosis » !

Lé mal parti l’afèr !

Pars la plipar bann péi déor, lé pa dakor sanm li : la Komissyon éropéène, li !Parlman éropéin, li ! Gouvèrnman l’Allemagne, li ! Lo prézidan bèlj l’Europ, li !Prézidan amérikin, li ! L’ONU, li ! Fidel Castro, li !... Oté ! Lé pa possib ! Gouvèrnman la France l’apré pass pou in gouvèrnman rasis ! Lo péi la Déklarasyon dé droi de l’om é dé sitoiyin la fine randi konmsa ? La lé grav la !

Justin


Kanalreunion.com