Oté

La lit, la lit, la lit,
vi k’na arienk sa k’i kont... boudikont !

Justin / 13 mars 2013

Matant Zélida la ékrir Justin :
Mon shèr nové, mon spès salté, rouz de fon dovan l’éternité,
Si mi jij bien d’apré sak i éspas, dovan mon zié, la gosh la pran pouvoir, mé li mèn pa larj, é i tard pa la droit, konm i di, va rotourn o z’afèr. Pou kosa mi di sa ? Pars si mi konpran bien, la gosh l’apré amèn la politik la droit, mé an émitan. L’émision i vo pa l’orizinal ! La prèv ? la gosh i pratik la fléksibilité pou bann travayèr, mé in fléksibilité i oz pa dir son nom, in fléksibilité dan la ont. Arzout èk sa, fo gouvèrnman la gosh i fé z’ékonomi : èl i doi trouv sink miliar pou l’ané k’i vien. Parl pi lo l’amann nèf miliar l’éro l’Erop i sort asézone ali. Dann tan la droit, l’amann konm sa l’avé poin. A, biensir, i parl pa l’ostérité, i di sa la pa l’ostérité, mé sof zot réspé, zot politik na l’gou l’ostérité, la koulèr l’ostérité, i fé mal parèy, mé sa la pa l’ostérité. Skiz amoin, mé sak i rod fé prann anou vési pou lantèrn, konm di lo kont, zot na ka alé tir in fèy. Tok ! Pran sa pou toué !

Jstin la fé pou répons :
Mon vié matant k’i koz touzour la boush rouvèr,
Mi konpran bien ou i krétik la gosh, mi konpran bien ou i di, sanm pou ou, la politik la gosh é la politik la droit lé parèy, topèt pou morèt, boi d’z’alimèt. Lé parèy vi k’inn konm l’ot té i vé pa i anparl l’ostérité, l’inn konm l’ot, boudikont, i fé pèy bann klas moiyène, bann ti kolon, bann rotrété, bann andikapé. Sof ké la gosh mol i fé sanblan fé pèy bann rish, mé i fé l’érèr k’i fo, konm sa Konsèy konstitisionèl i kas la loi i sort voté. Rapèl in pé lo transh 75 pou san ! L’èr-la, bann minis i di, zot la pa di lo mo d’la fin, zot i ronons pa. Kroiyé moi é fouté vou d’dan ! Sé sak bann ti kolon i konpran pa avèk lo gouvèrnman : i anparl rolans l’ékonomi, mé i rolans pa ! I anparl rolans l’anploi, i rolans pa ! I anparl fé pèy bann rish, mé i fé pa. I anparl protèz l’anvironman, mé arvoir Pièr, tak baro ! Astèr i parl la kriz, astèr i parl lo mank lo motif di pourkoi — la monaye par l’fèt —, mé Sarkozy té i fé sa osi. Alor, bann travayèr, kouk i rès azot pou fé ? La lit, la lit é ankor la lit ! Vi k’na arienk sa k’i pèy an finn kont. Tok ! Pran sa pou ou !

Justin


Kanalreunion.com