Oté

La lite i komans zordi ? Non va, la lite la fine komansé !

Justin / 9 mé 2012

I pé di La Rényon la rofé dann z’éléksyon prézidan. La rofé, pars promyé foi dépi in bout tan, in kandida i gingn in kantité lo voi konm François Hollande la gagné. Sé dir si demoun té i vé in shanjman ! Mi pans nora inn so kou isi, mé moin la pa sir é sèrtin tout i vé lo mèm shanjman. Biensir non !
In pé té i vé shanj solman prézidan, pars Sarko zot l’avé asé : son manyèr, son fason kozé, son bling-bling, étsétéra, étsétéra, la ké lo ra. Désèrtin lété fatigué so gouvèrnman par bann rish pou bann rish. Fatigué èk in gouvèrnmann razèr d’pint. Pou lo rèst, zot i fé konfyans lo kandida èk son soisant mézir épi son trant mézir pou bann péi l’Outre-mèr. In dèrnyé bann, dizon pli égzizan, la domann lo kandida si li apiy bann mézir té marké dann in kontra. Sa sé la bann la suiv nout Parti kominis rényoné, in plan pou transform La Rényon, son l’ékonomi, son sosyété, son l’ékolozi pou in péryod diz-an.
Moin la fine di, in bonpé d’moun lé dakor sanm nout prozé mèt lo trin La Rényon, fé l’otonomi énèrzétik, l’otosifizans alimantèr, dévlop la pèsh poison, mèt an plas dé gran sèrvis, inn pou rann sèrvis bann pèrsone azé sansa andikapé, inn pou protèz l’anvironman. Ni pé ankor azout èk sa fé in konpagni bato dan l’oséan Indien, sov Air Austral, sov l’avnir bann plantèr kann... donn Kréol travay. Moin lé sir na in bonpé d’moun i vé la mèm shoz ke nou : sa lé vré dan nout pèp, sa lé pa vré dan sak i apèl bann zété-mazor bann parti. La prèv, lo trikmardaz z’éléksyon réjyonal, épi d’ot kalité z’épizod i mark anou zordi ankor.
Ala pou kosa lo konba sar dir pou bann kandida nout parti. Dir i vé pa dir lé pèrdi d’avans... i vé dir la bézoin lité pou gagné. Sé pou sa ni pé di : la lite i komans zordi ? Non va, la lite la fine bien komansé !

 Justin 


Kanalreunion.com