Oté

La loi dsi l’égalité réèl oui ! Mé ousa i lé la démokrasi ? Lé mor dsou pyé kamélya ?

Justin / 4 out 2016

Mi sort aprann dann radyo, yèr l’avé konsèy dé minis gouvèrnman fransé. Banna té i sava diskite troi prozé : in prozé dsi lo gard nasyonal, in prozé dsi lo tienbo lo z’inpo dsi lo révni dopi lo kaptaj la sours, é in n’afèr i apèl « lo l’égalité réèl ». Apré soisant-dizan nou la pasé dann l’inégalité réèl lété déza tan. Sof ké, moin pèrsonèl, moin nana konm in doute. Pou kosa solon zot ? Pou in késtyonn métod é final de kont in késtyonn dsi sak na d’dan. Moin mi asht épa koshon dan ngoni, ni li shat dann sak !

Si mi tronp pa, bann dépité La Rényon, épi lé troi z’ot vyèy koloni, sé zot la fé vote la loi dsi départman fransé. Mèm ké avan lo zéléksyon dépité, tout la kanpagn demoun la diskite dsi so késtyonn départman, é bann partizan lo départman la gingn z’éléksyon. Donk plisyèr somenn, sinon plizyèr moi, bann pèp l’outro-mèr la diskite a-fon dsi program-la é pou finir sé z’ot prop dépité ké la dépoz lo loi é l’été voté a l’inanimité. Sa sé la démokrasi sa ! Non ?

Pli pré dé nou, Sarkozy la fé fèr lo z’éta zénéro é tout sak l ‘avé késhoz pou dir, tout sak l’avé in program pou défann-konm par égzanp lo dévlopman andojène, i pé dir osi oto-santré - la pran z’ot tan, la diskité épi lo prézidan, dann-tan la, la di kosa li sa mète dann son bann loi. Z’éta zénéro, sa i rapèl anou la révolisyon fransèz, donk sa sé in manyèr fèr démokratik si mi tronp pa.

Lo prozé dsi l’égalité réèl i port dsi vint’an é d’apré sak i di i doi amenn anou a ratrap nout rotar dsi lo l’égzagone. Pétète, konm pétète pa ! Pars sa la diskite déyèr nout do, la parl de nou, mé san nou. Alor mon bann dalon, d’apré sak mi oi, sa sé pa la démokrasi, sé inn émitasyon. Di amoin lo kontrèr, mi kroir ar pa ! Konm di lo kont maloya, la démokrasi lé mor dsou pyé kamélya !


Kanalreunion.com