Oté

La loi i vienn arpa rod lo pou dann zot tèt !

Témoignages.re / 5 févrié 2014

Moin la lir dann zournal é moin la antann galman dann télé in jenn marmay la pran in kou d’flash ball dann zyé é li lé riskab pèrd son zyé. Moin la lir osi bann ziz la min té lour kan zot la kondane in marmay sèzan in tralé moi d’prizon é la pankor fini vi k’nana in bonpé lété trapé é va pas an prosé. Suiv bien sa, zot va oir ! I sava pa pardone bann marmay-la... Moin la antann osi dann désèrtin radyo demoun apré di : "Tanmyé, kosa zot la parti fé dann l’émète ?"

Dann in n’afèr konmsa i vo myé tourn sèt foi son lang dann son boush avann kozé. Biensir bann moun bien-pansan nana zot sèrtitid : zot i koné kisa lé dann bon kan, kisa lé dann mové kan. Donk, i fo pa arprosh azot arien vi k’zot mèm la fine désid par avans kisa lé koupab é kisa lé pa koupab. Bann pétrolyé ! koupab pa koupab ? Pa koupab vi k’sé pa zot la parti alim dofé dann loto- sé sak mi kroi. Bann éstasion sèrvis ! Koupab, pa koupab ? Pétète i pé arprosh azot zot diskour anflamé, mé pèrsone la trap azot apré mète dofé, ni larg val-val dsi bann polis. La Polis ! koupab, pa koupab ? I pé di zot lé péyé pou fé késhoz é zot la fé, apré an avoir gingn lord... Bann jenn ! Tout fason, moin la zamé antann dir zot lé pou arien dann ninport ékèl trikmardaz.

Astèr si ni rod in pé pou kosa tousa l’arivé, ni pé di sé lo rézilta d’inn politik, mé mi san bien l’afèr lé tro vag. Kisa l’otèr si nou kréol nou lé pri dann la min korbo avèk l’oblidasyon tiliz in produi nou na poin in sèl gout isi.La pa la fote lo pétrolyé ! La pa la fote bann éstasyon sèrvis ! La pa lo traka la préféktir !.. Mé pou kosa nou lé blizé ansèrv in produi nou la poin... Donk in késtyon:ni pé s’anpas bann produi pétrolyé ? Astèr-la, ni pé di oui.Par kosa ni pé ranplas bann produi-la ? Par in takon z’afèr. Zot i souvien kan Paul Vergès té i anparl bann plak fotovoltaïk dsi la rout tamarin. Kan in pé la déboulone ali, tout suit la mète lo frin èk sa. Ki la mète lo frin ? Désèrtin zélu, é zot ésponsor dann fénoir é moin lé sir l’avé poi ariek in pti pé… Paul Vergès i anparl dopi lontan l’otosifizans dann l’énèrji é li na rézon, san foi olyé d’inn.

Donk, an zénéral, kisa lé koupab an avoir fé sa ? Sak la anmar nout pyé, la anmar nout min pou anpèsh nout shoi. Dann lo kèr la vérité sé sa ; lo bann ti kolon zot lé sinploman manipilé... Mé la loi i rogard pa sa, la loi i rogard lo lien dirèk rant in déga épi l’otèr lo déga. La loi i sousyé pa lo gran kantité mékontantman, lo gran kantité frustrasion. Lo bann vré résponsab i pé dor dsi zot dé zorèy, la loi i vienn ar pa rode lo pou dann zot tèt.

 Justin 


Kanalreunion.com