Oté

« La mark lo kou lé riskab éfasé, la tras mové kozman i spé k’i éfas pa zamé »

In kozman pou la rout

Justin / 10 novanm 2017

JPEG - 43.6 ko

Kozman-la, sa in provèrb l’Afrik. Konm zot i konpran sa i port dsi la konparézon rant lo kou épi mové kozman. Si i domann in moun lakèl rant lé dé i fé plis mal é pli lontan, lé posib demoun i réponn sé lo kou pars kan i mète aou la pa pou zoué. Mé lo kozman galman kan i mète aou i mète dir. Donk la kèl va fé plis mal é plis lontan ? Lo kou lé pou fé mal lo kor, mé kozman i donn aou doulèr dann l’am é konm zot i koné doulèr dann l’am sa sé in n’afèr i pass pa fasilman –alé oir doulèr lo kor avèk in bon kou d’pomade, épi inn-dé kashé lé riskab diminyé épi alé. Mi koné pa si zot i pans konm moin, mé si sé lo ka, kozman-la sé in l’invitasyon pou ténir son lang otan k’ i pé. Alé ! Mi lès azot réfléshi la dsi é ni artrouv pli d’van sipétadyé.