Oté

La météo i di pa toultan lo kontrèr de la vérité ?

Justin / 11 avril 2016

Mi pans zot i koné lo l’ékrivin i apèl Mark Twain ? Sa té in ga la viv dann diznévyème syèk. In vré kasèr lé kui é mi pans sé li la ékri bann liv Tom Soyèr in bonpé rant nou la vi lo band désiné. An parlann son talan pou kas lé kui, ala kosa li téi di dsi la météo é moin la mark anl’èr, dann tit mon modéki.

Mé koméla, la météo la fine vni in n’afèr sèryé é pliské sèryé dopi ké demoun la dékouvèr lo shanjman klimatik. La météo sa i kalkil lo tan va fé domin, sak l’été nana san t’an é plis, sak va fé d’isi la fin lo vintéinyèm syèk. Lé inportan konète bann pèryod la séshrès, la pli, la nèz, lo zèl, la tanpératir pars ni koné si la tanpèratir i goumant plis dé dogré nou nana traka pou avoir.

Donk pou kalkil tousala météo-Frans i tiliz dé sipèr kalkilatèr, dé bèl bébète l’ordinatèr. Figir azot sa lé kapab fé in milyonn milyar l’opérasyon dann in sogonn (sa i apèl in pétaflops) é la pa fini avèk sa pars d’isi 2019 son kapasité é son rapidité dann kalkil i sava goumant ankor troi foi donk troi milyonn milyar l’opérasyon dann in sogonn.

Biensir sa i anpèsh pa lo klima gaté, mé sa i pé pèrmète tras in plan pou sèy défann l’imanité dsi la késtyonn lo risk klimatik. Biensir nora été pli préférab pa fé la kouyonis konm i fé dopi in bon koup de tan mé sa i pé pèrmète anou pa koz la boush rouvèr épi di n’inport de koi dsi la météo konm par ébzanp « la météo i di pa touzou lo kontrèr d’la vérité »


Kanalreunion.com