Oté

La métod Coué ? Bin la koué la !

Témoignages.re / 30 désanm 2013

Zot i koné mésyé Hollande la promète pou la finision l’ané 2013, linvèrsion la kourb shomaz. Kosa sa i vé dir ? I vé dir a konté la finisin l’ané 2013, shomaz va komans diminyé, pa fé in plato, mé diminyé pou vréman. Moi d’oktob té in bon moi pars lo nonm shomèr la diminyé é pou toulmoun lo moi d’désanm té i doizète dann la kontinuité lo moi d’oktob, donk lo nonm shomèr téi doi diminyé. Mank de po la goumanté, sirtou shomaz bann jenn, épi shomaz bann sénior.

L’èr-la in pé d’moun té i kroi lo prézidan èk son gouvèrnman té i sava rokonète la réalité. Par ébzanp di konmsa, nou téi kont dsi l’invèrsion la kourb shomaj mé nou la konm fé in l’érèr, nou téi pans bann shomèr téi doi diminyé é la pa nakor lo ka. Mé la pa di konmsa, la sinploman di dopi komansman l’ané, shomaz i goumant moin vit : konm di lo kont la donn in kou d’ frin. L’èr-la gouvèrnman èk lo prézidan i di zot lé kontan pars sa mèm, solon zot, sé le linvèrsion la kourb shomaz in janr fo pla konm bann siklis i di plito k’in monté pli rèd.

Sa lé vré pou La Frans, mé pou nou ? Nout sitiasion lé tro mové pou dir na in progré mèm s in pé i ézit pa déklar nout sitiasionn travay la vni pli méyèr. Alé oir, mèm si tazantan i fé bann ti os-bès, La Rényon sé la réjionn l’erop la sitiasionn l’anploi lé lo pli mové. L’èr-la, in bann anonsèr moin mové nouvèl a tou kasé, i di nout sitiasionn l’anploi lé pli bon, touléka moin mové ké sèt La frans é la pa arienk sa, avèk la rout dan la mèr la sitiasion va amélyor ankor. Kroi touzour, fyé dsi mé kont pa tro.

Myé ksa, si l’anvi i pran azot zot i pé mèm aplik la métod coué ; Métod koué ? bin la, koué-la !

Justin

NB : Coué lété in farmasien. Li la konpri si i done son kliyan lo médikaman, avèk dé-troi bon parol, li lé sir va fé d’bien. Dizon i apèl sa léfé plasébo… Koméla i apèl sa la métod Coué. Mé dsi la késtyonn travay épi shomaz mi kroi pa sa in trikmardaz i marsh !


Kanalreunion.com