Oté

La montagn la mèt ba : li la gingn in souri !

Justin / 17 novembre 2012

Biensir, l’afèr la mal komansé. Li la komans an misouk, san di koman lé shoz i sava éspasé, san inform demoun dsi lo maniman la manivèl. Li la ranpli la sal avèk in bann moun déor. L’èr-la, bann moun isi la di, lo z’afèr i intérès pa zot. Sirtou kan zot la konpri gouvèrnman té sirman fine désid sink-si mézir é Promyé minis té i doi anons sa komansman moi d’désanm. Sirtou kan minis Lurel la déklar son volonté fini avèk lo prime COSPAR épi lo RSTA. Sa té in mine dan la konférans é té pliské normal lo z’afèr té i fé boum !

Fransh vérité, moin pèrsonèl, mi oi pa arien pou éskiz bann sabotèr La Rényon. Mi oi pa arien i pé éskiz Didier Robert pou tout sak zot i koné li la fé dopi 2010, mèm avan. Mi oi pa kosa i pé éskiz Parti sosyalis la pa di arien, la pa propoz arien, la fé konm si lo soisant plis trant mézir té sifizan pou La Rényon. In Parti sosyalis la pa ézit vann l’éritaz l’inyonn la gosh pou in pla lantiy : in pon di nor k’i koné mèm pa si va fé, ousa va fé, kansa va fé.

Mi partaz pa lo poinn-vizé bann sindika pars pou moin, zot la tonm dann pano mésyé Lurel : li la provok azot é zot la tonm dodan. Si tèlman ké dan troi-kat somèn, Promyé minis va fé son z’anons, é sak la pratik la shèz ranvèrsé, zot nora poin granshoz pou di. Pétèt lo gouvèrnman va suiv son minis Lurel. Pétèt bann promès François Hollande, zot va mèt sa dan poubèl l’istoir. Dakor, pétèt sak mi ékri lé vré, pétèt lé pa vré ! Pétèt, in foi an plis, va torpiy l’intéré bann Rényoné, mé ziska kan ? Ziska kan nout pèp va aksèp in n’afèr k’i pé pa aksépté ?

Pou lo moman, i arsanm la montagn la mèt ba, li la gingn in souri ! La sityasion lé tro grav pou k’sa i arèt konm sa. Sak i sèm lo van i ramas siklone : obli pa sa !

NB : Nout parti, in foi an plis, li lété tousèl pou propoz kinz mézir pou shanj lé shoz. Li na rézon biensir, mé na poin pli sour ké sak i vé pa antann ! Pli avèg ké sak i vé pa oir ! Pli mié ké sak i vé pa kozé !

Justin


Kanalreunion.com