La mor in jéan

Kan in gran Rényoné i sava pou fèr sak in pé i apèl lo gran voiyaz, nou na in pansé pou li, pou son famiy, é tout sak li la fé dan son vi piblik. Sé l’okazyon galman pou nou mazine la tèr nout péi la done demoun inportan, é tazantan désèrtin plis ké inportan. Sé konm sa mi oi Jacques Vergès, mor avan yèr dan son katrovin uit z’ané.

Mi pans tout konba li la améné kont bann puisans infèrnal konm lo nazism pandan la guèr trant-nèf karann sink, lo kolonyalism, kisoi dan l’Indochine, kisoi dan l’Aljéri, kisoi ankor dan la Palestine. Mi obli pa non pli tout sort kalité d’moun li la défann kan zot té dann kèr siklone la sosyété. Li la défann Klaus Barbie, Carlos, épi d’ot ankor... Mé nou lé pa sir pou vréman li la défann banna, pars moin na l’inprésyon li la plito atak in sosyété l’ésploitasyon, in sosyété la dominasyon, in sosyété l’ipokrizi. L’istoir, in pé i di, té fine done banna tor, mé kèl kalité l’istoir ? Par kèl bout i fo pran so l’istoir-la ? L’istoir bann dominé, sansa l’istoir bann dominèr ? L’istoir la vyolans demoun sansa sèt la vyolans l’Éta ? L’istoir bann monstré, mé bann monstré dan ékèl kan ? Jacques Vergès la parti, mé son késtyonman lé la.

Demoun konm moin lé pa né yèr, i rapèl bien lo pti broshir "Pour Djamila Bouhired", rézistant aljéryène, arété épi tortiré, kondané a mor épi grasyé par zénéral De Gaulle. Mi souvien osi lo prosé bann z’asasin Eliard Laude, in marmay disèt-an, in jènn kominis disèt-an, mor in zour z’éléksyon frodé dovan la méri Sint-Klotid l’ané 1959. Mi souvien galman son l’ékritir éstraordinèr, son l’élokans kan li té i plèd, ou sansa kan, tousèl dsi la sèn téat, li té apré fé son show dsi son stratézi d’défans.

Dann in sosyété nana bann nin, bann moun normal, bann moun inportan épi domoun sak lé gran. Mi pans Jacques Vergès té i fé parti bann moun sak té gran.

 Justin