Oté

La n’ar té bèl la ! Myé, la n’arté bliing-bliing !

Justin / 10 août 2010

Sa i sone konm in romans la viktoir. Lo l’imaz lé bèl vèy pa. Bann télé, bann gran zournal la Droite i donn lo grin. La Réjyon avèk l’État i done la min, i tyinbo lo rin, pou okip la mobilité téritoryal. Karant mil biyé l’aviyon pou sink san éro inn, provik ou i gingn moins ké vinn-sis mil l’éro dann l’ané.
Déssi lo fonn l’afèr, nou na lo tan pou arkozé, mé déssi la manyèr i fé la piblisité, la na dé shoz a rodir.
Zot i souvyin, dann tan, na in mèr... par l’fète l’ansyin mèr Tampon, avan Didier Robert, l’avé gingn in kou d’zok pars li l’avé mète son foto déssi la karte kantine bann marmay, sansa déssi la kart transpor éskolèr. La préféktir la di ali mète i frin èk sa siouplé.
Zordi, sé lo Didier Robert li mèm k’i fé mète son foto dann la pib pou son l’éspès mobilité téritoryal. Sa i vienn komansé, moin lé a d’mandé ziska oussa li v’alé. Ziska li prézante ali konm sénatèr… konm dépité… sansa konm lo brui i komans kouri konm mèr Sinni. Moin lé a dmandé ossi, akoz na poin la foto Sarkozy li-mèm déssi lo pib. La n’ar té bèl la ! Myé, la n’arté bliing-bliing.

Nb : sak la pa vi sa, i fo rogardé. Zot va oir par zot mèm !

Justin


Kanalreunion.com