Oté

La néna in gob, lé sir !

Justin / 2 zwin 2015

Dopi lontan minm lo rosh i fé parti nout folklor dann zéléksyon. Pou bann in pé pli azé, nout tout i an souvyin koman lo rosh té i grinn si la tol la kaz landomin zéléksyon, sinonsa diran la kanpagn minm. Koman ni pé oublié ? Souvan dé fwa lo késon kamyon té plin, té paré pou vanjé konm i di. Mi koné pa si zordi néna in rapor èk zéléksyon rézyonal find lané, mé ala zordi ni roparl lo rosh. Touzour lo rosh dann kamyon. Konm i diré, sé konm si listwar i répèt. Mé la zordi sé pa pou parl rosh isi, sé pou parl rosh la ba déor.

Mwin la finn anparl a zot lo léskandal lo rosh Madégaskar. Bann la rézyon la désid fé la rout si la mèr, konm zot sé in bann boug résponsab ki réfléshi bokou, zot la prévi tout, mé la oublié lésansyèl, zot la oublié prévwar lo rosh an kantité. Konm si in moun i sar mont in kaz an béton é toudinkou li ran a li kont ké siman na pwin, ousinonsa i mank la tol ou gravié. Ala poukoué zordi zot té i vé artourn a zot si Madégaskar pou trouv lo rosh ki mank.

Mé la zordi in zournal i dénons in ot léskandal, touzour si lo rosh. I prétan néna lontan in pé té informé la d’si, dopi 2011 néna té i fé lo vativyin ant Madégaskar èk la Rényon, té pou prépar tousala an misouk. Zordi mi konpran in pé mié, poukoué tousala koméraz si lo rosh Mada. In manièr pou inn dé boug o kouran organiz a zot pou bord bann konkiran. Alé war ou si néna in lyin èk zéléksyon rézyonal ? Si néna lé pi konm lontan. Sanm pou mwin, la néna in gob, lé sir !


Kanalreunion.com