Oté

La noss èk in ké la mori !

Justin / 2 séptanm 2010

A ! Kissa la di Didier, lo roi la Réjyon, i okip pa la rolans lékonomi ? Kissa l’apré okip son tan èk in bannn ladi-lafé déssi la Réjyon Rényon. A té fasil kozé kan Didier té pa la ! Bouz azot zordi !
Didier Robert la koz dann télé yèr soir, é konm banna lé byin onète, zot la lèss ali débite son bann paroli. Li la koz déssi la kontinuité téritoryal... in manyèr tir dan la posh bann Rényoné sak l’État i doi péyé. La parl lordinatèr. La parl sirtou la rolans lo batiman. Par koman li vé fé sa ? Lé sinp, li sava ède bann komine fé avans bann projé konm i di, lé koinsé dann karton.
Pou konbyin larzan siouplé ? Déboush byin zot trou d’zorèy si i fo èk in boi zalimète. Pou trant-é-in milyon l’éro. Mi pans zot la tonm rède... pars sa i fé mèm pa lo pri in lisé, i fé mèm pa lo pri lo batiman prévi pou la MCUR, trant-uit milyon é lékipman é tou té prévi pou katrovin-sink milyon. Mi pans bann lantropriz batiman i doi z’ète kontan. Zot kèr i doi déborde èk romèrsiman. Trant-é-in milyon, sa sé do bèr dan lé zépinar ! Piman shinoi déssi la vyann griyé ! La soss dann salade.
Konm mon défin gran-mèr noré di, inn noss pou in ké la mori !

NB : dann lo trant-é-in milyon nana larzan pou aranz Téat Luc Donat,Tampon. In projé le mèr Didier Rober la pa nyabou tir dann karton. In projé lo prézidan la Réjyon-promyé-adzoin-lo-mèr-Tampon va nyabou tir dann fénoir. I fé d’shoz moun-la !

Justin


Kanalreunion.com