Oté

La ou néna Rokin, néna touzour Zangi !

Justin / 7 févrié 2015

I prétan zandarm la débark dann biro lo prézidan la rézyon rényon lo 30 zanvié 2015, i prétan ! A mwin mi rovann a zot konm mwin la ashté san fé bénéfiss, i prétan zot la arivé, san prévni la rant andan é apré ni pé pi konèt koué la di, koué la fé. Tousala lé sogré pou lo moman. Dapré lo prézidan la rézyon li minm, na pwin grin mayi pou moud, zardarm lavé swaf, la rantré, la bi, sétaki in pé d’lo frèsh, dot in bièr byin glasé ousinonsa in limona sitron, Kan té fini, la romérsié lo prézidan épi banna la détaké.

Dapré li, mé bann gro-gro léspri i komans kozé déza, i di si banna té la, sé pou rézon i dwa an awar sirman in gro zangi d’sou rosh. Sak mwin lé sir, si 13km dan la mèr konm sa, i dwa an awar zangi ? La fin d’lané 2014 déza bann zandarm téla, dawar lété vni zis pou kas lanbordir èk bann zanplwayé inn ti néstan. Néna i di, in pé té minm blinm èk la pèr zour la. Pou lèr, éské banna i rod lo pou ou na pwin ousinonsa néna pou vréman dé koi ankété, konm i di lèss la zistis fé son lankèt.

Mi koné pa si va fé pou vréman so nouvo rout di litoral é sirtou kansa va fé èk tout so ralé-pousé otour. Yèr transportèr i grèv, aprésa lantropriz i an souplingn, sak la pa ginyè, bann lasosiasyon i vé pa antann parlé ditou, sanm pou mwin lé pa zordi la vèy pou komansé. Vi la kantité larzan i roprézant tousala, vi la grosèr lo shantié. vik nou lé dan la mèr, vik ni sar zèt larzan andan, mi vé néna rokin i dwa pa dormi la nwit pou réfléhi koman kapar shakinn son morso. Sirtou la ou néna Rokin néna touzour Zangi !


Kanalreunion.com