La pa anpèsh aèl fé avans son prop koz !

Matant Zélida la ékrir Justin :
Mon shèr nové, mon spès salté, rouj-de-fon dovan léternité,
Mi an apèrsoi dann zournal, zot i malparl madam Bello, poitan, a par k’èl, mi oi pa d’ot moun pou rolèv in pé bann rouj. El lé popilèr. Droit konm gosh i vote pou èl. Sa i anpèsh pa èl dir ninport kisa zot kat vérité, kisoi minis, kisoi prézidan, kisoi sénatèr Vergès, sansa d’ot ankor. Dopi inn-dé zour, i malparl d’èl akoz rokin, konm si èl lété l’otèr si na rokin dan la mèr é si in pé d’moun san pridans i rant dan la mèr kan k’i konvien pa épi lèr-la i ariv zaksidan ; Tout fason, an parmi bann kriyèr d’nuit, sé èl la konplimant lo préfé. Sak i prouv, kan i fé in n’afèr d’bien, èl i koné done son aprobasyon. Si toulmoun té konm èl la, bin moin lé sir, La Rényon nora été in pé plis avansé ; Tout fason, mi pans l’avnir va done aèl rézon é zot, bann rouj de fon, zot sar konm bèf i gard lo trin la viktoir pasé. Tok ! Pran sa pou toi !

Justin la fé pou répons :
Mon vyé matant ki koz arienk la boush rouvèr,
Vi domann ousa La Rényon nora été randu si toulmoun té konm madam Bello, é bin, mi pé dir aou, La Rényon nora rokil in pé plis zour an zour. In prèv ? Madanm Bello la bien défann lé fam si tèlman k’èl té i aparète konm lavoka bann fanm maltrété. Ou na rézon, mé sa i romont, pars kan èl la gingn lokazyon fé pas in loi kadr pou la défans bann fam, èl la pa fé. Si tèlman ké zordi, sé madam Orphée l’apré okip de sa.
Arzout èk sa, èl lété dann in parti nana de tou tan in bann projé pou dévlop La Rényon, é bin, èl la pa profit son pozisyon pou fé avans lo bann projé son parti. Na dé zour, li lé pi dann parti-la, donk sak’èl la pa fé kan èl lété an parmi la pa zordi èl va fé. La pa èl la mouy son shomiz pou tram-trin, pou la MCUR, pou dévlopman la pèsh, pou lé dé gran sèrvis. Donk, sak èl té i pé fèr pou fé avans la koz di pèp rényoné, èl la pa fé. Par kont, èl la pa mank fé avans son prop koz. Tok ! Pran sa pou ou !

NB : An parlan problèm rokin, mi pans, in zour, kan va suiv sèt afèr-la, va romark sa in n’afèr té mal améné konm sa, améné an ki dsi tèt, konm di lo kont an sharèt shaviré.

Justin