Oté

La pa èk baton tonton nou va pass la rivyèr

Justin / 11 octobre 2011

Alé savoir kosa in moun nana dan son tète kan li sava voté. Dann tan lontan, mé pa tro, té i falé ou i sava voté pars sinon la méri té riskab pa done aou bon roz pou alé médsin, sansa rofiz aou in sokour. Tan lontan lété konm sa, é anplis ké sa, in pé té i bour lo l’irn... Alor kosa té i ansèrv fors in moun alé voté, sinon pou abèss ali in pé vi k’ou la fine déside fé akoush lo momon koshon. Koméla, lé pi konm sa. I pé mèm dir, lo votaz lé près démokratik. Près solman pars i pé pa dir lé démokratik pou vréman. Sanm pou moin, i pé pa dir ankor, lo vote i roprézant bien la volonté popilèr. Dizon i aprosh in pé la volonté popilèr, in pé solman !

Bon ! Si ni kalkil in pé, ni pé domann anou pou kosa in sitoiyin, konm ou, konm moin, konm d’ot la parti voté dimansh pasé. Sirtou ké té pa pou mète in moun konm prézidan, sansa la plas dépité. Pars sa lété in primèr, donk in z’éléksyon pou shoizi lo kandida pou moi d’mé 2012. Lé for sa, ou i vote zis pou shoizi kisa i sava port ali moi d’mé konm prézidan. Dann désèrtin péi konm l’Amérik, sa sé in n’afèr ki fé pou vréman, mé dan la Frans, sé promyé foi k’i fé in n’afèr konmsa. An plis ké sa, sé Parti sosyalis ki roganiz lo zéléksyon, é ou lé pa blizé an avoir la kart parti-la pou voté.

Na kant mèm plis dé milyon sink san mil moun la voté dimansh. In pé mal fondé la di, pti pé d’voi-la ! La poin do koi kass kat pate in kanar. In pé la di, sa in manyèr pou mète an fish in bonpé d’moun. In pé la pans, konm in boug té i di dann biro koté moin, sa in manyèr shoizi lo boug i doi rash lo kro Sarkozy l’ané proshène. In bon rézon an vérité ! Moin mi pans, sa in l’okazyon pou lo fitir prézidan ar-oir son rolasyon avèk l’Outre-mèr, é pou moin, sa sé in rézon valab. Tanka bann boug l’aparèy i pans sé zot k’i sava, an katimini, fé in program pou l’Outre-mèr dépi Paris, mi pans pa zot la rézon. Pou kosa ? Pars, pou moin, sé nou, bann Rényoné an zénéral, k’i doi fé nout program pou La Rényon. Boudikont, sé konmsa va marshé, é la pa avèk baton tonton nou va travèrs la rivyèr.

Justin


Kanalreunion.com