Oté

La pa girouète k’i shanj diréksyon, sé lo van !

Justin / 1er mars 2010

Girouète ? La poin sa issi... la-ba dan la Frans nana. Sa in léspèss volay métalik demoun i mète déssi zot toi pou donn la diréksyon épi la fors lo van. Donk li tourn dann in sans sansa dann in n’ote kan lo van i shanj diréksyon. Si lo van lé fay, li tourn dousman, é si lé in pé pli for, li tourn pli vite. Touléka, d’apré sak moin la antann, toultan li grins.
Girouète ? Nana sa issi, pars i nonm konmsa bann moun i shanj l’opinyon shak instan. Zordi i di blan, domin i di blé, sansa vèr, sansa noir. Zordi i di in n’afèr lé bon, domin i di sa la pa bon. Dan in n’afèr konmsa, in shate i artrouv pi son pti.
Na in kandida i apèl Magamootoo. Li lé prézidan la Shanm de komèrs, zordi li lé kandida pou zéléksyon rézyonal é li vé shanj palto. Shanj palto, sansa vir ali dovan déyèr ? Sa mi souètré d’konète... Nana dé-troi moi, li té i di : « Tram-train ? Sa in n’afèr nou la bézoin ». Zordi li vé pi, li pans sa la pa in priorité. Kan mi di azot nana zirouète La Rényon, zot i oi moin nana rézon. Alors koman li ésplik sa d’apré zot ? Bin lé sinp… li di l’anvironman la shanjé, lé shoz lé pi parèy, é si, é la, étsétéri-étsétéra, la ké lo ra. Pétète domin li va di A380 lé pa bon pou nou, vo myé li sava poz Moris, sinon Madégaskar. Avèk demoun konmsa, nout kanar lé noir !
Konm noré di méssyé Edgard Faure, in l’ansyin prézidan gouvèrnman la Frans : « La pa la girouète k’i shanj diréksyon, sé lo van ! ». Kroiyé-moi é fouté-vou d’dan !

Justin


Kanalreunion.com