Oté

La pa in politik shoviy gonflé nou la bézoin.
Kalkil azot bien !

Justin / 15 janvier 2013

Gouvèrnman la fé in réform pou done anou sèt dépité olèrk sink avan sa. Arzout èk sa, nou la gingn kat sénatèr olèrk troi. I pé pa di nout roprézantasion nasional lé mèg-mèg. I pé mèm dir, si nout bann z’éli té i vé bien fé l’éfor, zot nora té kapab antour gouvèrnman, pa pou fé ali d’tor, mé pou fé anou d’bien. Kosa i lé lo bien pou nou ? Pou nou, sé in bon program dévlopman, sé galman in program pou soubat kont la mizèr, épi lo sèt plé l’Égipt apré tonm dsi nou konm lo shomaj, l’ilétrism, lo mank lojman, lo kalité l’ansègnman. Epi tout sak i s’ansui.

Alé oir, tir Paul Vergès, ou na l’inprésion tout i pans lé shoz i roul ron, touléka tout i pans i pé pa mié marshé ké sa. Donk, pran nout mal an pasians, sirtou ké sé pa zot mal azot ! Mi domann amoin si banna i san pa zot bien dan lo promié moitié Rénioné, sak la vi lé bèl pou zot. Moin lé a d’mandé si pou banna, lo dézièm mond la pa in mond i fo trèt avèk ti-kontra, épi lé z’èd, épi bann loi Lurel... moin la fine di, sé in kotèr dsi in zanm de boi. Ala késtion mi poz amoin. Si la pa lo vré késtion, kansa banna i poz so vé késtion-la ? Dan bann késtion oral l’asanblé ? Eskiz amoin, mé moin la pa antann. Dan zot kourié gouvernman ? Eskiz amoin, mé moin la pa lir sa.

In tan, bann z’éli La Rénion té i réini azot épi, ansanm-avèk, zot té i fé in plat-form pou défann l’intéré nout péi épi sèt nout pèp. Mi souvien bien l’Alians té i fé sa. Mi rapèl bien Konsèy réjional, dann tan Paul Vergès té prézidan, é Konsèy zénéral la fine fé bann plat-form épi la di : "Ala sak bann Rénioné i vé k’i fé dan lo péi !". I pé pa dir sa la pa in bon démarsh ! Zordi, z’éléksion dépité, sénatèr la fini, la pa l’èr, d’apré zot, pou in vré diskision rant z’éli rénioné pou fé avans in pé la koz nout péi é nout pèp ? Amoins k’in pé i pans, ala in méri pou gagné, ala bann pozisionn pouvoir pou an avoir, ala ban post Konsèy zénéral sansa réjional...

Mésié zé dam, la pa sak bann Rénioné la bézoin, la pa sak Rénioné i vé ; La pa in politik shoviy gonflé nou la bézoin. Kalkil azot bien !

NB : Kan i di, in boug son shoviy la gonflé, sa i vé dir son l’orgèy la fine pran la plas son rézon, son santiman, son sans l’intéré zénéral.

Justin


Kanalreunion.com