Oté

La pa la météo k’i déklansh mové tan ! Li anons soloman !

Justin / 6 zanvié 2016

Matant Zélida la ékrir justin :

Mon shèr nové, mon spès salté, rouj-de-fon dovan l’étèrnité, si mi konpran bien, pou zot la, nou lé dann kèr d’danzé nou la ! I fo ni viv lo zour dan la pèr é la nuite dann la krint. La trankilité i fo ni tras in kroi définitiv la dsi ! Poitan m’a dir aou mon nové, moin nana ni la pèr, ni la krint. Pou kosa ? Pars La Frans lé la. Si i fo tir lé z’arm èl va tir pou nou ! Si ni mank manjé, èl va done anou. Sé nout mèr patri, in poin sé tou. Ou i pans èl la poin lo moiyin ! Arète aou trankil, arète azot trankil : tro d’bonèr i déranj la tèt désèrtin, i fo kroir ! tok ! Pran sa pou toi !

Justin la fé pou répons :

Mon vyé matant k’i koz touzou la boush rouvèr, ankor in foi moin lé pa dakor avèk ou. Promyèrman ni domann pa d’moun viv dann la pèr ou sansa dann la krint pars mèm si nout mond lé danzéré, la pèr avèk la krint i ansèrv de rien : sa k’i fo sé pran son prékosyon, fé sak ou i pé pou ansort aou konm k’i fo. Kan siklone i ménas, avan kashyète sou out li, kloute bien out port, klout bien out fénète, agard bien si out kaz la pa dann in ravine sansa alé o sant. Si sa i protèz pa ou san pour san o moins ou n’ora fé out nésésèr.

Solon ou, nou na tor dir lo mond lé danzéré, mèm pou nou. Poitan li lé danzéré : nana la guèr in pé partou. Matant l’Iran avèk l’Arabie Saoudite lé pa loin, la Syrie, l’Irak, l’Afganistan sa lé pa loin non pli é la-ba tangaz i mank pa. Diégo Garcia lé à in distans dé mil kilomète de nou é la-ba nana lo pli grann baz militèr z’amérikin la fé an déor d’zot péi. Arzout èk sa téroris par dépitasyon, sa i an mank pa é toulmoun i koné. Tir azot nasyonalité fransèz sé konm mète in pansman dsi in zanm dé boi.

Donk ou i oi matant, konm i di la pa la météo k’i fé lo mové tan ! Li anons soloman ! Li la pa lo résponsab ! Tok ! Pran sa pou ou !


Kanalreunion.com