« La pa pars mon posh na trou, ké mi doi pi port shapo ! » - In kozman pou la rout

Sa sé in provèrb i komans a daté. Dann tan tout bann bonome, tout bann madam osi, té i port shapo. In n’afèr moin la antann shé in voizin ; konsèy de in momon pou son garson : « Ou i rant dann biro, ou i tir out shapo, pars in onm, avan tout, sé in shapo. » Donk in sign ou nana out dignité. Mi antan dir dann tan l’ésklavaz zésklav té ui port pa shapo, sa té rézèrvé pou l’moun lib. Donk ou lé pov mé ou na out dignité kant mèm. Sa sé in n’afèr a pa oblyé ! I di osi : la pa pars ou lé pov ké ou la pèrd out droi.

Kosa zot i anpans ? Arien ditou, Fé travay z’ot koko ! Fé bouye z’ot matyèr griz ! Zot va oir ké rant-rant, ni pé z’ète, tazantan, dakor rantre nou.