Oté

La pa pou kass dosik dsi zot tète !

Justin / 6 mars 2015

Zot va dir amoin, mi rode tro lo bout. Mon momon té i di amoin souvan dé foi in n’afèr konmsa… L’èr-la figuir azot moin l’apré rode in kalité dsik spésyal k’i bote amoin épi k’i fé pa tro lo tor mon santé. In foi, moin l’ashète dosik kann Maurice l’avé fine bate in karé dann la banlyé Pari. Sé dir azot ! Na dé zour, mi ashté in kilo d’sik dann in gayar karton avèk in pti rosète konfitir patate. Mi anparl pa zot !

Fyèr konm Rataban, mi ariv la kaz ; mi rouv pa tout suit, mé kant mi détak lo pti bèk vèrsèr, fourmi la fine install azot dodan. Arzout èk sa lo sik lé pal, vèy pa, é moin la tandi dir, oplis li lé fonsé, oplis nana nitriman dodan... Si zot i vé, oplis la mélass lé malanjé é nana nitriman anndan. Alor mi di, mi sa anvoy banna in mèl avan d’larg in bandaj pars moin na l’inprésyon la pran amoin pou sak mi pans moin lé pa : in roi d’kouyon si zot i vé !

Alors, mi anvoy mon mèl, mi poz mon késtyon, mèm dé troi késtyon, oki d’ répons ; lo l’adrès la fine shanjé, i fo téléfone azot pou an avoir lo vré. Mi romète a domin biensir pars moin lé konmsa, mi mont konm lé dsi l’fé épizapré mi rodésann. I paré sa i apèl la soup do lé !.. Domin ou va oir, é touléka si tout i défann bien zot krout konm bann fézèr d’sik nou lé sové. Antansion, la pa pou kass dé sik dsi zot tète, mé kant mèm ?


Kanalreunion.com