Oté

La pa sa k’i sava boulvèrs la fas di mond !

Justin / 6 octobre 2016

Zordi nou lé bien-é dopi soisann-dizan - dann l’inégalité réèl é oila k’in loi i propoz anou konm pou tout bann péi l’outre-mèr l’égalité réèl pou dann vin-t’an. Soi sé in bon nouvèl, soi i vé balad anou ankor konm la boul shifon. Soi sé in fion, in trap kouyon, in manyèr fé prann anou po d’shanm pou pla kouvèr.

Pou kosa mi di sa ? Pars, sanm pou moin, La Frans épi l’Erop lé touzour parèy. Z’ot zénérozité lé pa pli gran ké z’ote volonté pou rann sèrvis bann gran group kapitalis. Alor kan zot i fé vote in loi, moin lé sir é sèrtin dann désèrtin kabiné sogré nana désèrtin k’i manyé la kalkilète pou zot konète konbien lo voul sa sa raport azot an plis.

Pou kosa mi di sa ? Pars, mi souvien bien kan Sarkozy la désid lo dévlopman andojène lété, d’apré sak li téi di, in manyèr dévlop bann péi l’outre-mèr dann l’androi zot i lé. Moin téi kroi sa dir konm fèr, mé moin la konpri toutsuit sa lété pou ède bann sosyété kapitalis pou dévlop z’ot komèrs ankor plis avèk bann péi lé dan lé z’alantour d’nou.

Alor, mi di dann mon kèr, si La Frans épi l’érop té i vé pou vréman kass avèk lo néo-kolonyalis k’i fé anou bonpé lo tor, kat z’ané Hollland lé o pouvoir, kart z’ané l’Erop nou n’oré di déza rann anou kont kékshoz la shanjé mé sé pa lo ka. Donk lé pa étonan ké nou lé dési. Ala pou kosa la pa la loi dsi l’égalité réèl i fé palpite nout kèr... mé, konm zot i koné l’istoir in momon la fout in raklé son garson.

Ni pé pans sak ni vé dsi in n’afèr konmsa, mé konm i di la pa sa k’i sava shanj la fas di mond.


Kanalreunion.com